Poytaxtda korrupsiyaga oid navbatdagi holat fosh etildi. Toshkent shahri tumanlaridan birida faoliyat yurituvchi elektr tarmoqlari korxonasiga qarashli ikki nafar muhandis xizmat vazifasini suiisteʼmol qilgan holda pora talab qilgani aniqlandi.
Maʼlumotlarga koʻra, muhandislar tijorat banki filiali binosida oʻrnatilgan elektr hisoblagichni tekshirish jarayonida qonunbuzilish holatini qayd etgan. Tekshiruv davomida hisoblagich tarmoqqa notoʻgʻri sxema orqali ulangani va shu sababli elektr energiyasi sarfi boʻyicha hisob-kitoblar notoʻgʻri yuritilgani maʼlum boʻlgan. Ushbu asosda 400 million soʻm miqdorida jarima qoʻllanilishi belgilangan.
Biroq mansabdor shaxslar bu holatdan shaxsiy manfaat yoʻlida foydalanishga uringan. Ular elektr tarmogʻini ulash ishlarini amalga oshirgan masʼul MCHJ rahbariga jarima miqdorini 65 million soʻmgacha kamaytirib berishni taklif qilgan va buning evaziga 8 ming AQSH dollari talab qilgan.
Oʻtkazilgan tezkor tadbir natijasida, Davlat xavfsizlik xizmatining hududiy boshqarmasi hamda Iqtisodiy jinoyatlarga qarshi kurashish departamenti xodimlari muhandislarni pora mablagʻini uchinchi shaxs orqali qabul qilayotgan vaqtda qoʻlga oldi.
Hozirgi vaqtda mazkur holat yuzasidan jinoyat ishi qoʻzgʻatilgan boʻlib, barcha holatlar atroflicha oʻrganilmoqda. Tergov harakatlari davom etmoqda va aybdor shaxslarga nisbatan qonuniy chora koʻrilishi kutilmoqda.
Mutasaddilar fuqarolarni bunday qonunbuzilishlarga befarq boʻlmaslikka chaqirmoqda. Agar shunday holatlarga duch kelinsa, 1520 qisqa raqami orqali xabar berish mumkinligi taʼkidlandi. Shu bilan birga, murojaat etuvchilarning shaxsi sir saqlanishi kafolatlanadi.
“Zamin”ni Telegramʻda oʻqing!
