Sogʻlom turmush tarzini saqlashda ozuqa tanlovi hal qiluvchi ahamiyatga ega. Mutaxassislar fikricha, kundalik ratsionga zaytun qoʻshish yurak-qon tomir tizimi uchun katta foyda keltirishi mumkin. Amerikalik kardiolog Brett A. Silave bu mahsulotning yashirin, ammo muhim foydali jihatlari haqida batafsil maʼlumot berdi.
Shifokor taʼkidlashicha, zaytun tarkibida mavjud boʻlgan sogʻlom yogʻlar, ayniqsa olein kislotasi organizmdagi xolesterin muvozanatini yaxshilashga xizmat qiladi. U past zichlikdagi lipoprotein (yaʼni “yomon” xolesterin) miqdorini kamaytirib, aksincha, yuqori zichlikdagi lipoprotein (“yaxshi” xolesterin) darajasini oshirishga yordam beradi.
Bundan tashqari, olein kislotasi yalligʻlanish jarayonlarini pasaytirish xususiyatiga ham ega. Bu esa qon tomirlarida xavfli plakalar paydo boʻlishining oldini olish, ularning elastikligini saqlab qolish va qon bosimini barqarorlashtirishga yordam beradi. Natijada yurak kasalliklari rivojlanish xavfi sezilarli darajada kamayadi.
Mutaxassislar zaytun faqat yogʻlar bilan cheklanmasligini ham taʼkidlamoqda. Uning tarkibida tola, antioksidantlar kabi organizm uchun zarur boʻlgan bir qator ozuqaviy moddalar mavjud. Bu elementlar umumiy salomatlikni qoʻllab-quvvatlashda muhim rol oʻynaydi.
Brett A. Silave soʻzlariga koʻra, zaytunda temir va mis kabi minerallar ham bor. Ular qizil qon tanachalarining toʻgʻri ishlashini taʼminlaydi, immun tizimini mustahkamlaydi va yurak faoliyatini qoʻllab-quvvatlaydi.
Qisqacha aytganda, zaytunni muntazam isteʼmol qilish nafaqat mazali odat, balki sogʻliq uchun aqlli investitsiya hamdir. Kichik bir mahsulot — katta foyda, desak mubolagʻa boʻlmaydi.
“Zamin”ni Telegramʻda oʻqing!
