Oʻzbekistonda ekologik vaziyatni yaxshilash va shaharlarda transport yuklamasini kamaytirish maqsadida yangi tashabbus yoʻlga qoʻyilmoqda. 2026 yil 1 maydan boshlab har oyning 10 va 25 sanalari “avtomobilsiz kun” sifatida belgilanadi.
Qonunchilikka muvofiq, ushbu aksiya doirasida davlat fuqarolik xizmatchilari uchun ayrim cheklovlar joriy etiladi. Xususan, belgilangan kunlarda xizmat avtomobillaridan foydalanish taqiqlanadi.
Shu bilan birga, agar ushbu sanalar ish kunlariga toʻgʻri kelsa, haydovchilarning ish haqi saqlab qolinadi. Bu esa xodimlarning ijtimoiy manfaatlarini himoya qilishga qaratilgan chora sifatida baholanmoqda.
Mutaxassislar fikricha, bunday tadbirlar havo ifloslanishini kamaytirish, jamoat transportidan foydalanishni ommalashtirish hamda aholi oʻrtasida ekologik madaniyatni shakllantirishda muhim ahamiyat kasb etadi.
Qayd etilishicha, “avtomobilsiz kun” amaliyoti jahonning koʻplab mamlakatlarida qoʻllanilib, atrof-muhitni muhofaza qilish va yoʻllardagi tirbandlikni kamaytirishda samarali vosita sifatida oʻzini oqlagan.
