Nijniy Novgorodning «Lokomotiv» klubi sobiq murabbiyi Valeriy Ovchinnikov mart oyida Gvatemala terma jamoasi Rossiyaga qarshi o‘rtoqlik uchrashuvini o‘tkazishdan bosh tortgani yuzasidan fikr bildirdi. Gvatemala futboli rahbariyati bu qarorni boshqa jamoalar bilan avvaldan kelishilgan o‘yinlar borligi bilan izohlagan. Bu haqda euro-football.ru xabar beradi.
Mutaxassisning aytishicha, agar Gvatemala rad etsa, Rossiya baribir boshqa raqib topadi. Ovchinnikov bunday qaror ortida Gvatemaladagi siyosiy vaziyatning ta’siri bo‘lishi yoki ular Rossiyaga qarshi o‘ynashga hozircha tayyor emasligini anglashlari mumkinligini ta’kidladi.
Shuningdek, u rossiyaliklar uchun ayni paytda kim bo‘lishidan qat’i nazar, uchrashuv tashkil etish muhimligini, chunki rasmiy o‘yinlar yetishmayotgan sharoitda jamoaga o‘yin amaliyoti va ritm zarurligini qo‘shimcha qildi.
Dastlabki ma’lumotlarga ko‘ra, Rossiya mart oyida Afrika vakili — Mali terma jamoasiga qarshi o‘rtoqlik bahsida maydonga tushishi mumkin.
“Zamin”ni Telegramʻda oʻqing!
