O‘zbekiston milliy terma jamoasi bosh murabbiyi Fabio Kannavaro “Prime Video Sport IT” kanaliga bergan intervyusida jamoaga kelishi tarixi va bu qaror ortidagi asosiy omillar haqida batafsil to‘xtalib o‘tdi.
Tajribali mutaxassisning aytishicha, u jamoaga kelgunga qadar termada muayyan o‘zgarishlar yuz bergan. Xususan, avvalgi bosh murabbiy Srechko Katanes sog‘lig‘i bilan bog‘liq muammolar sabab lavozimini tark etgan. Shu paytda jamoani vaqtincha mahalliy murabbiy qabul qilib, saralash bosqichida muvaffaqiyatli natijalar qayd etgan.
“Jamoada avval Katanes ishlayotgan edi. Lekin oxirgi o‘yinlar arafasida u sog‘ligi tufayli chetlashdi. Keyin mahalliy murabbiy ishni davom ettirdi va jamoa saralashdan muvaffaqiyatli o‘tdi. Shundan keyin federatsiya xorijlik mutaxassis taklif qilishga qaror qildi”, — deya izoh berdi Kannavaro.
Italiyalik murabbiy O‘zbekistonga ilk bor rasmiy taklifdan ancha oldin tashrif buyurganini ham eslab o‘tdi. U “afsonalar o‘yini” doirasida mamlakatga kelib, mahalliy futbol muhiti, infratuzilma va atmosfera bilan tanishib chiqqanini aytdi.
“Men avval ‘afsonalar o‘yini‘da qatnashish uchun kelganman. Shu orqali muhitni biroz his qildim. O‘sha yerda federatsiya vitse-prezidenti bilan uchrashdim — u sobiq xalqaro hakam edi. Biz muloqot qildik, keyin oradan bir necha hafta o‘tib u menga qo‘ng‘iroq qildi va uchrashuv taklif qildi. Men esa bu taklifni hech qanday ikkilanishsiz qabul qildim”, — deydi murabbiy.
Kannavaro shuningdek, bu qarorni qabul qilishda moliyaviy jihatlar u qadar muhim bo‘lmaganini alohida taʼkidladi. Uning so‘zlariga ko‘ra, asosiy omil — sportiy maqsad va jahon chempionatiga chiqish orzusi bo‘lgan.
“Men u bilan pul yoki boshqa shartlar haqida umuman gaplashmadim. Men uchun eng muhimi — jahon chempionatiga chiqish imkoniyati. Buni his qilish, bu yo‘ldan o‘tish — allaqachon katta yutuq”, — deya so‘zini yakunladi Kannavaro.
Qayd etish joiz, ushbu intervyu murabbiyning shaxsiy qarashlari va maqsadlarini ochib berishi bilan muxlislarda katta qiziqish uyg‘otdi. Endi esa barcha eʼtibor uning boshchiligidagi jamoaning kelgusi natijalariga qaratilgan.
“Zamin”ni Telegramʻda oʻqing!
