Angliya Premyer-ligasining 32-turi doirasida Londonda “Chelsi” maydonida o‘tkazilgan bahsda “Manchester Siti” ishonchli 3:0 hisobida g‘alaba qozongan bo‘lsa-da, ushbu uchrashuv klub uchun yoqimsiz yangilik bilan yakunlandi.
Bellashuvda hisobni ochgan Niko O‘Reyli ikkinchi bo‘limda son orqa mushaklari bilan bog‘liq noqulaylik sabab maydonni erta tark etishga majbur bo‘ldi.
21 yoshli yosh iqtidorli futbolchi yana bir bor o‘zining samaradorligini ko‘rsatib, Rayan Sherkining aniq uzatmasidan keyin bosh bilan gol urib, 51-daqiqada “Siti”ni oldinga olib chiqdi va “Stemford Bridj”da jamoaga katta ustunlik taqdim etdi.
Shundan so‘ng “Manchester Siti” ustunligini yana-da oshirdi — Mark Gexi va Jeremi Doku bittadan gol kiritib, hisobni 3:0 ko‘rinishiga keltirishdi.
Biroq g‘alaba quvonchi orasida muxlislar uchun xavotirli holat yuzaga keldi: O‘Reyli jarohat olib, 65-daqiqada Rayan Ayt-Nuri bilan almashtirildi.
Hozircha futbolchining jarohati qanchalik jiddiy ekani aniq emas. Shuningdek, uning kelasi hafta “Arsenal”ga qarshi hal qiluvchi uchrashuvda maydonga tusha olishi ham savol ostida qolmoqda.
Yosh yulduzning holati endi “Siti” murabbiylar shtabi uchun asosiy bosh og‘riqlardan biriga aylanishi mumkin.
“Zamin”ni Telegramʻda oʻqing!
