Angliyaning Chelsi klubi AQSH bozoridagi o‘z ta’sirini kuchaytirish maqsadida Roc Nation Sports International kompaniyasi bilan strategik hamkorlik shartnomasini imzoladi. Ushbu kelishuv klubning nafaqat sport, balki musiqa va madaniyat olamida ham o‘z mavqeini mustahkamlashga qaratilgan. Bu haqda Goal.com xabar beradi.
Hamkorlik doirasida tomonlar Amerika pop-madaniyati bilan uyg‘unlashgan holda Chelsi brendini rivojlantirish va yangi avlod muxlislarini jalb etish bo‘yicha turli kampaniyalarni amalga oshirishni rejalashtirmoqda. Klub vakili Skott Fentonning so‘zlariga ko‘ra, bu qadam futbolni turmush tarzi sifatida qabul qiluvchi muxlislar bilan yanada yaqinroq aloqa o‘rnatishga xizmat qiladi.
Roc Nation Sports International prezidenti Maykl Yormark futbolning AQSHdagi madaniy ta’siri ortib borayotganini ta’kidlab, Chelsi bilan birgalikda zamonaviy muxlislar uchun muhim bo‘lgan platformalarda faol ishtirok etish niyatida ekanliklarini bildirdi. Kompaniya avvalroq Vinicius Junior va Endrick kabi yulduzlar bilan ham ishlagan.
Ayni damda Chelsi Angliya Premer-ligasi mavsumining yakuniy qismini o‘tkazmoqda. Shuningdek, jamoa yaqinlashib kelayotgan Angliya kubogi finalida Manchester Siti klubiga qarshi maydonga tushishga tayyorgarlik ko‘rmoqda.
“Zamin”ni Telegramʻda oʻqing!
