Sunʼiy intellekt texnologiyalariga boʻlgan talabning keskin ortishi tadbirkorlarni kosmosdan maʼlumotlar markazlari sifatida foydalanish gʻoyasiga yetaklamoqda. Biroq, bu sohada asosiy muammo mavjud: orbital maʼlumotlar markazlarini joylashtirish uchun raketalar yetishmaydi va ularning narxi juda qimmat. Hozircha aksariyat kompaniyalar SpaceX kompaniyasining Starship raketasiga umid bogʻlamoqda, biroq uning tijoriy foydalanishga topshirilishi uzoq vaqt talab qilishi mumkin. Bu haqda Techcrunch.com xabar beradi.
Cowboy Space Corporation kompaniyasi ushbu muammoni hal qilish uchun oʻz raketa dasturini ishlab chiqishga qaror qildi. Kompaniya Index Ventures boshchiligidagi Series B investitsiya bosqichida 275 million dollar mablagʻ jalb qildi va uning umumiy qiymati 2 milliard dollarga baholandi. Robinhood asoschilaridan biri Bayju Bhatt tomonidan tashkil etilgan ushbu startap 2028-yil oxirigacha ilk parvozni amalga oshirishni rejalashtirmoqda.
Dastlab Aetherflux nomi bilan tashkil etilgan kompaniya kosmosda quyosh energiyasini toʻplash va uni Yerga uzatishni maqsad qilgan edi. Biroq, orbital maʼlumotlar markazlari gʻoyasi va mavjud raketa tashuvchilarning tanqisligi kompaniyani oʻz raketa dasturini yaratishga majbur qildi. Bhattning soʻzlariga koʻra, mavjud raketa provayderlari koʻpincha oʻzlarining yuklariga ustunlik berishadi, bu esa tashqi mijozlar uchun imkoniyatlarni cheklaydi.
Oʻz raketasini ishlab chiqish juda murakkab va tavakkalchilikka boy jarayon hisoblanadi. Hozirgi kunda Gʻarbda SpaceX, Rocket Lab va Arianespace kabi sanoqli kompaniyalargina tijoriy raketalarni muvaffaqiyatli uchirmoqda. Cowboy Space Corporation ushbu qadam bilan SpaceX va Blue Origin kabi soha gigantlari bilan toʻgʻridan-toʻgʻri raqobatga kirishmoqda.
“Zamin”ni Telegramʻda oʻqing!
