Mashhur link-ulash xizmati Digg oʻz faoliyatini yangicha formatda qayta tiklamoqda. Avvalroq Reddit platformasiga raqobatchi sifatida qayta ishlangan loyiha botlar hujumi va yetarlicha farqlanmagan funksionallik sababli yopilishga majbur boʻlgan edi. Endilikda kompaniya asoschisi Kevin Rose loyihani butunlay yangi yoʻnalishda, yaʼni sunʼiy intellekt (AI) yangiliklarini saralovchi agregator sifatida qayta ishga tushirdi. Bu haqda Techcrunch.com xabar beradi.
Yangi Digg platformasining asosiy maqsadi — maʼlum bir sohadagi eng nufuzli manbalarni kuzatish va foydalanuvchilar uchun haqiqatan ham ahamiyatli boʻlgan xabarlarni ajratib koʻrsatishdir. Hozircha loyiha faqat AI yoʻnalishidagi yangiliklar bilan ishlamoqda, biroq muvaffaqiyat qozonilgan taqdirda, qamrov doirasi kengaytirilishi rejalashtirilgan.
Platforma oʻz reyting tizimini yaratishda X ijtimoiy tarmogʻidan olinadigan real vaqt rejimidagi maʼlumotlarga tayanadi. Digg algoritmlari kontentni tahlil qilish, klasterlash va foydalanuvchilarning munosabatini oʻrganish orqali eng dolzarb mavzularni aniqlaydi. Foydalanuvchilar sahifada eng koʻp koʻrilgan, muhokama qilinayotgan va tez ommalashayotgan yangiliklarni kuzatib borishlari mumkin.
Hozirgi bosqichda loyiha beta-test rejimida ishlamoqda va baʼzi texnik kamchiliklarga ega. Kompaniya vakillarining taʼkidlashicha, bu hali yakuniy mahsulot emas, balki foydalanuvchilarga yangi konsepsiyani taqdim etish uchun moʻljallangan dastlabki versiyadir.
“Zamin”ni Telegramʻda oʻqing!
