Koreya elektrotexnika instituti tadqiqotchilari qattiq jismli akkumulyatorlar bozorga chiqishini tezlashtiruvchi yangi texnologiyani ishlab chiqdi. Ular elektrodlar va qattiq elektrolit o'rtasidagi aloqani yaxshilash uchun nanoolchamdagi qalay qatlamidan foydalanishni taklif qildi. Bu haqda Ixbt.com xabar beradi.
Bu ichki yo'qotishlarni kamaytiradi va litiy anodining barqaror ishlashiga yordam beradi.
Yangi ishlanmaning asosiy afzalligi shundaki, bunday batareyalar 2 MPa atrofidagi nisbatan past bosimda ham samarali ishlay oladi. Odatda qattiq jismli akkumulyatorlar yuqori bosim va murakkab konstruksiyalarni talab qiladi.
Bu esa ularning massasi, o'lchamlari va narxini oshirib yuboradi.
Sinovlar davomida bunday oraliq qatlamga ega hujayralar 350 Vt·soat/kg dan ortiq energiya sig'imini ko'rsatdi. Bu oddiy litiy-ionli akkumulyatorlarga qaraganda ancha yuqori ko'rsatkich hisoblanadi.
Shuningdek, 500 marta zaryadlash va zaryadsizlantirish siklidan so'ng batareyalar o'z sig'imining 81 foizidan ko'prog'ini saqlab qoldi.
Texnologiya materiallar chegarasidagi qarshilikni kamaytirish va litiy dendritlari o'sishini bostirish hisobiga ishlaydi. Nanoolchamdagi qalay qatlami ionlar harakati uchun qo'shimcha yo'l yaratadi va litiyni parchalanishdan himoya qiladi.
Mualliflarning fikricha, ushbu texnologiya elektromobillar, robototexnika va energiya saqlash tizimlarida qo'llanilishi mumkin.
“Zamin”ni Telegramʻda oʻqing!
