SpaceX kompaniyasi tomonidan ishlab chiqilayotgan yangi avlod Super Heavy V3 raketa tezlatgichi uchun mo‘ljallangan yangi panjarali rul (grid fin) yaqindan namoyish etildi. X ijtimoiy tarmog‘idagi taniqli kuzatuvchi Dima Zeniuk ta’kidlashicha, yangi avlod tezlatgichlari uchun butunlay qayta ishlangan boshqaruv tizimi ishlab chiqilgan. Bu haqda Ixbt.com xabar beradi.
Asosiy o‘zgarish shundaki, SpaceX muhandislari to‘rtta panjarali rul o‘rniga uchtasidan foydalanishga qaror qilishdi. Shu bilan birga, ushbu elementlarning o‘lchami 50 foizga kattalashgan va ularning mustahkamligi sezilarli darajada oshirilgan. Bu yangilik bosqichning atmosferaga qaytish jarayonida yanada samarali boshqaruvni ta’minlaydi hamda barqarorlikni yo‘qotmagan holda keskinroq burchak ostida qo‘nish imkonini beradi.
Ayni paytda SpaceX Starship Flight 12 parvoziga tayyorgarlik ko‘rmoqda, biroq jarayonda ba’zi kechikishlar kuzatilmoqda. Kompaniya yoqilg‘i quyish jarayoni boshlanishidan oldin Wet Dress Rehearsal — parvoz oldi to‘liq mashg‘ulotini to‘xtatishga majbur bo‘ldi.
Shunga qaramay, yaqinda SpaceX 33 ta Super Heavy dvigatellarining muvaffaqiyatli sinovini o‘tkazdi. Shuningdek, kompaniya Texasdagi Pad 2 start maydonchasida Starship V3 versiyasini to‘liq yig‘ish ishlarini yakunladi.
“Zamin”ni Telegramʻda oʻqing!
