Taʼlim texnologiyalari giganti Instructure kompaniyasi yaqinda yuz bergan maʼlumotlar sizib chiqishi ortidan yana bir kiberhujum nishoniga aylandi. Xakerlar guruhining taʼkidlashicha, ular Canvas platformasidan foydalanuvchi bir nechta maktablarning kirish sahifalarini buzib kirib, u yerga oʻzlarining tahdidli xabarlarini joylashtirishgan. Bu haqda Techcrunch.com xabar beradi.
ShinyHunters nomi bilan tanilgan kiberjinoyatchilar guruhi ushbu hujum uchun javobgarlikni oʻz zimmasiga oldi. Ular kompaniyadan tovon puli talab qilib, aks holda oʻgʻirlangan shaxsiy maʼlumotlarni 12-may kuni ommaga oshkor qilish bilan tahdid qilmoqda. Hozirgi vaqtda Canvas portali texnik xizmat koʻrsatish bahonasi bilan vaqtincha yopilgan.
Mutaxassislarning fikricha, xakerlar ushbu harakatlar orqali Instructure kompaniyasiga bosimni kuchaytirishga urinmoqda. Dastlabki hujumda dunyo boʻylab 9 mingga yaqin maktab va 231 million kishining maʼlumotlari oʻgʻirlangani daʼvo qilingan edi. Hozircha xakerlar tizimga qanday kirib olgani haqida aniq maʼlumotlar yoʻq.
Instructure vakillari yuzaga kelgan vaziyat yuzasidan hozircha rasmiy izoh bermadi. ShinyHunters guruhi esa bu ikkinchi va alohida kiberhujum ekanligini taʼkidlamoqda. Kompaniya foydalanuvchilari va oʻquv muassasalari xavfsizlik choralarini kuchaytirishga chaqirilmoqda.
“Zamin”ni Telegramʻda oʻqing!
