Venmo to‘lov ilovasi 2021-yildan buyon amalga oshirilgan eng yirik dizayn yangilanishini e’lon qildi. Ushbu o‘zgarishlar ilovani yanada qulay, ijtimoiy va navigatsiya uchun sodda qilishga qaratilgan. Mutaxassislar ushbu yangilanishni PayPal kompaniyasining Venmo’ni alohida biznes birligiga aylantirish va ehtimoliy sotuvga tayyorgarlik ko‘rish jarayoni sifatida baholamoqda. Bu haqda Techcrunch.com xabar beradi.
Ilovaning yangi tasmada foydalanuvchilar to‘lovlar bilan bog‘liq vizual elementlarni, jumladan, kattalashtirilgan tasvirlar va tezkor reaksiyalarni ko‘rishlari mumkin. Shuningdek, "Pay Again" va "Say Thanks" kabi tugmalar qo‘shilib, shaxsiylashtirilgan keshbek takliflari va xaridlar tarixiga asoslangan tavsiyalar tizimi joriy etildi. "Give a Shoutout" funksiyasi esa foydalanuvchilarga o‘zlari yoqtirgan mahalliy bizneslarni qo‘llab-quvvatlash imkonini beradi.
Kelgusi oylarda "Send" va "Money" nomli yangi bo‘limlar ishga tushiriladi. "Send" bo‘limida tez-tez muloqot qilinadigan kontaktlar yuqorida ko‘rinadi, xarajatlarni bo‘lishish (Groups) funksiyasi esa 30 kishigacha bo‘lgan guruhlar uchun qulaylashtirildi. "Money" bo‘limi orqali esa Teen Accounts, kriptovalyuta operatsiyalari va xarajatlarni boshqarish imkoniyatlari birlashtiriladi.
Venmo rahbariyati ushbu yangilanishlar bir yillik foydalanuvchi tadqiqotlari natijasida ishlab chiqilganini ta’kidlamoqda. Tadqiqotlar shuni ko‘rsatdiki, ko‘plab foydalanuvchilar ilovadagi mavjud funksiyalardan xabardor emas. Yangi dizayn aynan shu muammoni bartaraf etib, xizmatlardan foydalanishni yanada intuitiv qilishni maqsad qilgan.
“Zamin”ni Telegramʻda oʻqing!
