TikTok kompaniyasi foydalanuvchilarga mehmonxonalar, diqqatga sazovor joylar va turli xizmatlarni bevosita ilova ichida qidirish hamda bron qilish imkonini beruvchi TikTok GO xizmatini ishga tushirdi. Hozircha AQShda 18 yoshdan oshgan foydalanuvchilar uchun taqdim etilgan ushbu funksiya videolar, qidiruv tizimi va joylashuv sahifalari orqali sayohat yoʻnalishlarini topishga yordam beradi. Bu haqda Techcrunch.com xabar beradi.
Yangi xizmat Booking.com, Expedia, Viator, GetYourGuide, Tiqets va Trip.com kabi yirik platformalar bilan hamkorlikda yoʻlga qoʻyildi. Kontent yaratuvchilar oʻz videolariga bron qilish havolalarini qoʻshishlari va shu orqali komissiya hamda maxsus kampaniyalar evaziga daromad olishlari mumkin.
TikTok GO platformaning foydalanuvchilarni ilova ichida uzoqroq ushlab turish strategiyasining bir qismidir. Xuddi 2023-yilda ishga tushirilgan TikTok Shop kabi, bu yangilik ham foydalanuvchilarni tashqi saytlarga oʻtmasdan, barcha jarayonlarni ilova ichida yakunlashga undaydi.
Ushbu qadam TikTok'ni Google bilan raqobatda yanada kuchaytiradi. Koʻplab foydalanuvchilar qidiruv tizimi sifatida Google oʻrniga TikTok'dan foydalanayotgan bir paytda, kompaniyaning sayyohlik bozoriga kirib kelishi Google Maps va qidiruv xizmatlariga jiddiy taʼsir koʻrsatishi mumkin.
TikTok USDS Joint Venture bosh direktori Adam Presserning soʻzlariga koʻra, TikTok GO ilhom olish lahzasini biznes bilan bevosita bogʻlaydi. Bu esa nafaqat kontent yaratuvchilar, balki mahalliy biznes vakillari va butun hamjamiyat uchun yangi imkoniyatlar eshigini ochadi.
“Zamin”ni Telegramʻda oʻqing!
