BYD kompaniyasi Yuan Plus krossoverining yangi, uchinchi avlodini rasman taqdim etishga tayyorgarlik koʻrmoqda. Modelning premyerasi 21-may kuni Xitoyda boʻlib oʻtadi. Ilk bor Pekin avtosalonida namoyish etilgan ushbu avtomobil seriyali versiyada yangilangan tashqi koʻrinish, qayta ishlangan salon va ilgʻor texnik xususiyatlarga ega boʻldi. Bu haqda Ixbt.com xabar beradi.
Yangi krossover yanada zamonaviy va ixcham dizayn bilan ajralib turadi. Avtomobil olti xil rangda taklif etiladi, eshik tutqichlari esa yarim yashirin shaklda ishlangan. Mashinaning oʻlchamlari 4665 x 1895 x 1675 mm ni, gʻildirak bazasi esa 2770 mm ni tashkil etadi. Xaridorlar 18 yoki 19 dyuymli gʻildirak disklarini tanlashlari mumkin.
Salon ichida katta markaziy displey oʻrnatilgan, uzatmalar qutisi selektori esa rul ustidagi dasta koʻrinishiga keltirilgan. Markaziy konsolda smartfonlar uchun simsiz quvvatlash paneli paydo boʻldi. BYD muhandislari interfeysni haddan tashqari sensorlashtirmaslik uchun baʼzi jismoniy tugmalarni saqlab qolishga qaror qilishdi.
Texnik jihatdan Yuan Plus orqa uzatmali yangi elektr platformaga oʻtdi. Model 278 va 326 ot kuchiga ega ikkita elektr dvigatel varianti bilan taqdim etiladi. Avtomobil ikkinchi avlod Blade akkumulyatorlari bilan jihozlangan boʻlib, u tezkor quvvatlash texnologiyasini qoʻllab-quvvatlaydi va bir marta quvvatlanganda 630 km masofani bosib oʻtish imkonini beradi.
“Zamin”ni Telegramʻda oʻqing!
