Adaption kompaniyasi sunʼiy intellektni oʻzini oʻzi oʻqituvchi AutoScientist vositasini taqdim etdi
Sunʼiy intellekt tadqiqotchilari uzoq vaqtdan beri tizimlar inson yordamisiz oʻzini oʻzi takomillashtira oladigan davrni kutishmoqda. Adaption kompaniyasi ushbu maqsad sari muhim qadam tashlab, AutoScientist nomli yangi mahsulotini namoyish qildi. Ushbu vosita avtomatlashtirilgan yondashuv orqali sunʼiy intellekt modellarini tezkorlik bilan oʻqitish va ularni muayyan vazifalarga moslashtirish imkonini beradi. Bu haqda Techcrunch.com xabar beradi.
Kompaniya bosh direktori Sara Hookerning taʼkidlashicha, AutoScientist maʼlumotlar va modelni bir vaqtning oʻzida optimallashtiradi. Bu jarayon sunʼiy intellektni oʻqitishni yirik laboratoriyalardan tashqarida ham muvaffaqiyatli amalga oshirishga yoʻl ochadi. Yangi tizim kompaniyaning avvalroq taqdim etilgan Adaptive Data mahsuloti negizida qurilgan boʻlib, u doimiy ravishda takomillashib boruvchi maʼlumotlar toʻplamini samarali modellarga aylantirishga xizmat qiladi.
Adaption mutaxassislari AutoScientist yordamida turli modellarning samaradorlik koʻrsatkichlari ikki barobardan koʻproq oshganini qayd etishmoqda. Garchi anʼanaviy test tizimlari ushbu vosita uchun toʻliq mos kelmasa-da, kompaniya foydalanuvchilar natijalarni tezda his qilishlariga ishonchi komil. Shu sababli, dastlabki 30 kun davomida vositadan bepul foydalanish imkoniyati taqdim etilmoqda.
Hookerning soʻzlariga koʻra, ushbu texnologiya kod generatsiyasi kabi turli sohalarda innovatsiyalarni jadallashtirishga yordam beradi. Adaption butun tizim stack'i har qanday vazifaga moslashuvchan boʻlishi va real vaqt rejimida optimallashishi kerak degan qarashni ilgari surmoqda.
“Zamin”ni Telegramʻda oʻqing!
