Venture kapital olamida bu hafta eng ko‘p muhokama qilingan voqealardan biri General Catalyst (GC) kompaniyasining o‘ziga xos marketing hujumi bo‘ldi. Kompaniya X ijtimoiy tarmog‘ida Apple'ning mashhur "Mac vs. PC" reklamalarini parodiya qiluvchi "VC vs GC" nomli videoni e’lon qildi. Videoda "VC" obrazi Andreessen Horowitz (a16z) asoschisi Marc Andreessen'ga ishora qiluvchi qiyofada tasvirlangan. Bu haqda Techcrunch.com xabar beradi.
Videoda "VC" sun’iy intellekt asosida ishlaydigan robot-itni maqtaydi va uning haqiqiy itlardan afzalligini ta’kidlaydi. Bunga javoban GC vakili mas’uliyat va haqiqiy qadriyatlar muhimligini eslatib, raqibining yondashuvini kinoya bilan tanqid qiladi. Yakunda robot-it "VC"ni quvib ketishi bilan video yakunlanadi.
Ushbu post qisqa vaqt ichida 2,4 milliondan ortiq ko‘rishlar soniga yetib, katta shov-shuvga sabab bo‘ldi. Ko‘pchilik buni General Catalyst'ning a16z kompaniyasiga qarshi qaratilgan ochiq hujumi deb baholamoqda. Mazkur xabar orqali GC boshqa venchur fondlar, xususan, a16z har qanday loyihaga sarmoya kiritishini, o‘zlari esa tanlovda ancha qat’iy ekanliklarini ko‘rsatmoqchi bo‘ldi.
Garchi bu argument o‘rinli ko‘rinsa-da, tahlilchilar GC'ning o‘z portfelida ham Anduril va Polymarket kabi bahsli loyihalar borligini eslatib o‘tishdi. Har ikki tomon ham o‘ziga xos investitsiya strategiyasiga ega bo‘lsa-da, bu kabi marketing usullari venchur kapital bozoridagi raqobat qanchalik keskinlashganini yaqqol namoyon etmoqda.
“Zamin”ni Telegramʻda oʻqing!
