SpaceX rahbari Ilon Mask Emirates aviakompaniyasining o‘z Airbus A380 samolyotlarida Starlink sun’iy yo‘ldosh internetini joriy etgani haqidagi xabarini bo‘lishdi. Emirates kompaniyasi ushbu texnologiyaning imkoniyatlari haqida batafsil ma’lumot berdi: birinchi Airbus A380 layneri allaqachon Starlink tizimi bilan parvozlarni amalga oshirmoqda. Bu haqda Ixbt.com xabar beradi.
Aviakompaniya barcha toifadagi yo‘lovchilar uchun bepul Wi-Fi xizmatini taqdim etmoqda. Hozirda Emirates parkida Starlink bilan jihozlangan 33 ta samolyot mavjud bo‘lib, kelajakda bu ko‘rsatkichni 232 ta laynerga yetkazish rejalashtirilgan. Mazkur samolyotlar Yaqin Sharq, Osiyo-Tinch okeani mintaqasi, Yevropa, Afrika va Amerika yo‘nalishlarida xizmat ko‘rsatmoqda.
Yo‘lovchilar parvoz davomida video striming, onlayn o‘yinlar va ish jarayonlarini uzluksiz davom ettirish imkoniyatiga ega bo‘lishadi. Starlink Aviation rahbari Nik Zeytsning so‘zlariga ko‘ra, tizim tijorat samolyotlarida 2 Gbit/s dan ortiq tezlikni ta’minlay oladi.
Emirates ushbu texnologiyani 2025-yil noyabridan boshlab Boeing 777 samolyotlariga ham o‘rnatishni boshlaydi va 2027-yil o‘rtalariga qadar butun flotni modernizatsiya qilishni yakunlaydi. Ushbu loyiha aviakompaniyaning 5 milliard dollarlik modernizatsiya dasturining bir qismi hisoblanadi.
“Zamin”ni Telegramʻda oʻqing!
