SpaceX kompaniyasi Starship parvoziga tayyorgarlikni jadallashtirmoqda. Ship 39 prototipi Massey’s maydonchasiga qaytarilgach, mutaxassislar uni yoqilg‘i bilan to‘ldirish va bo‘shatish bo‘yicha navbatdagi muhim sinovlarni o‘tkazishdi. Kuzatuvchilarning fikricha, bu Booster 19 raketasini start maydonchasiga qaytarishdan oldingi so‘nggi bosqichlardan biri hisoblanadi. Bu haqda Ixbt.com xabar beradi.
Shu bilan birga, Starbase hududidagi Pad 2 infratuzilmasi ham qattiq nazoratdan o‘tkazilmoqda. So‘nggi ikki kun ichida SpaceX suv bilan sovutish va zarba to‘lqinini bostirish tizimini to‘rtinchi bor to‘liq quvvatda sinab ko‘rdi. Kechki payt o‘tkazilgan sinovlar chog‘ida start majmuasidan otilib chiqqan ulkan suv oqimlari haqiqiy «sharshara»ni eslatdi.
Flight 12 parvozi 20-may sanasiga belgilanishi mumkin. Mazkur missiya yangi avlod Raptor 3 dvigatellari bilan jihozlangan Starship uchun ilk sinov bo‘ladi. Raptor 2 bilan solishtirganda, yangi dvigatellar yuqori tortish kuchi, samaradorlik va yengil vaznga ega. Shuningdek, ular tashqi issiqlik himoyasiga muhtoj emas va ishlab chiqarishda to‘rt barobar arzonroq tushadi.
Starship — bu SpaceX kompaniyasi tomonidan ishlab chiqilayotgan to‘liq qayta foydalanish mumkin bo‘lgan o‘ta og‘ir raketa tizimi. U yuklar va odamlarni Yer orbitasi, Oy hamda Marsga yetkazish uchun mo‘ljallangan. Ilon Maskning ta’kidlashicha, kelajakdagi Starship V4 versiyasi yanada kuchliroq bo‘lib, start vaqtida 10 000 tonnagacha tortish kuchini ta’minlashi rejalashtirilgan.
“Zamin”ni Telegramʻda oʻqing!
