Rossiyaning Aeroflot aviakompaniyasi CIPR konferensiyasida yoʻlovchilarga xizmat koʻrsatish uchun moʻljallangan Vasilisa nomli interaktiv raqamli avatarni namoyish qildi. Ushbu yechim ilgʻor LLM modellari va RAG texnologiyasi asosida yaratilgan boʻlib, sunʼiy intellekt yordamida mijozlar bilan muloqot qiladi. Bu haqda Ixbt.com xabar beradi.
Vasilisa bilan muloqot maxsus sensorli ekranli kiosklar orqali amalga oshiriladi. Raqamli yordamchi nutq va matnni tushunish qobiliyatiga ega boʻlib, u aviakompaniya xizmatlari boʻyicha maslahatlar beradi, aviachiptalarni qidirish va rasmiylashtirish jarayonlarida koʻmaklashadi.
Ushbu loyihaning asosiy maqsadi aeroportlardagi axborot stoykalariga tushadigan yuklamani kamaytirish va yoʻlovchilarga tezkor xizmat koʻrsatishni taʼminlashdan iborat. Shuningdek, tizim imkoniyati cheklangan yoʻlovchilar uchun ham moslashtirilgan boʻlib, ularga qulaylik yaratishga qaratilgan.
Kelgusida Aeroflot ushbu texnologiyani yanada rivojlantirish va uning funksional imkoniyatlarini kengaytirishni rejalashtirmoqda. Ishlab chiquvchilarning taʼkidlashicha, Vasilisaning universalligi uni nafaqat aeroportlarda, balki temir yoʻl vokzallari va boshqa yirik transport markazlarida ham samarali qoʻllash imkonini beradi.
“Zamin”ni Telegramʻda oʻqing!
