Fai Nur va uning hamkorlari Amit Bhatnagar hamda Pritesh Kadiwala tomonidan asos solingan Status AI loyihasi ijtimoiy tarmoqlar kelajagini butunlay o‘zgartirishni maqsad qilgan. ChatGPT texnologiyasidan ilhomlangan jamoa foydalanuvchilarga shunchaki kontentni kuzatish emas, balki o‘zlari yoqtirgan olamlarda yashash va istalgan personaj rolini ijro etish imkonini beruvchi platformani yaratdi. Bu haqda Techcrunch.com xabar beradi.
Status AI ilovasida foydalanuvchilar o‘zlariga xos personaj yaratib, virtual olamlarga sho‘ng‘iydilar. Bu yerda voqealar rivoji va muhit aynan o‘yinchilarning o‘zaro muloqoti orqali shakllanadi. Platforma ham yakka tartibdagi, ham ko‘p foydalanuvchili rejimlarni qo‘llab-quvvatlaydi, bu esa do‘stlar bilan birgalikda hikoyalar yaratish imkonini beradi.
Kompaniya yaqinda General Catalyst, Y Combinator va LightShed Partners kabi yirik investorlardan 17 million dollar miqdorida sarmoya jalb qildi. Ushbu mablag‘lar passiv kontent iste’mol qilish davri o‘tib, foydalanuvchilar hikoyalarning faol ishtirokchisiga aylanishi kerak bo‘lgan yangi davrni moliyalashtirishga yo‘naltiriladi.
Media kompaniyalar ham ushbu trendga katta qiziqish bildirmoqda. Status AI investorlaridan biri Rich Greenfieldning ta’kidlashicha, bugungi kunda media olami muxlislarni o‘zlari yaratgan olamlar ichida yashashga undaydigan platformalarga muhtoj. Status AI aynan shu talabni qondirib, ijodkorlik va texnologiyani birlashtirgan yangi ekotizimni taklif etmoqda.
“Zamin”ni Telegramʻda oʻqing!
