Реал Мадрид ярим ҳимоячилари Федерико Вальверде ва Аурелиен Тчоуамени ўртасида юз берган жанжал клуб ичида катта шов-шувга сабаб бўлди. Клуб президенти Флорентино Перез матбуот анжуманида ушбу ҳолатга изоҳ берар экан, жамоа ичида бундай келишмовчиликлар аввал ҳам бўлганини ва бу футболнинг бир қисми эканини таъкидлади. Бу ҳақда Goal.com хабар беради.
Перезни энг кўп хафа қилган нарса жанжалнинг ўзи эмас, балки бу маълумотнинг матбуотга сизиб чиққани бўлди. Унинг сўзларига кўра, футболчилар ўзаро келишиб олиши мумкин, аммо клуб ичидаги гапларнинг ташқарига чиқиши жамоа обрўсига путур етказади. Президент бу маълумотни ким тарқатганини аниқлашганини ҳам қўшимча қилди.
Тўқнашув оқибатида Федерико Вальверде бош қисмидан жароҳат олиб, шифохонага ётқизилган эди. Клуб шифокорлари унга бош мия чайқалиши ташхисини қўйишди ва футболчи 10–14 кун давомида дам олиши кераклиги белгиланди.
Аурелиен Тчоуамени юз берган воқеа учун узр сўраб, Реал Мадрид каби дунёнинг энг машҳур клубида бундай хатти-ҳаракатлар номақбул эканини тан олди. Клуб раҳбарияти ички суриштирувдан сўнг ҳар иккала футболчини 500 минг евро миқдорида жаримага тортди ва интизомий ишни ёпилган деб эълон қилди.
“Zamin”ни Telegram'да ўқинг!
