Real Madrid yarim himoyachilari Federico Valverde va Aurélien Tchouameni o‘rtasida yuz bergan janjal klub ichida katta shov-shuvga sabab bo‘ldi. Klub prezidenti Florentino Pérez matbuot anjumanida ushbu holatga izoh berar ekan, jamoa ichida bunday kelishmovchiliklar avval ham bo‘lganini va bu futbolning bir qismi ekanini ta’kidladi. Bu haqda Goal.com xabar beradi.
Pérezni eng ko‘p xafa qilgan narsa janjalning o‘zi emas, balki bu ma’lumotning matbuotga sizib chiqqani bo‘ldi. Uning so‘zlariga ko‘ra, futbolchilar o‘zaro kelishib olishi mumkin, ammo klub ichidagi gaplarning tashqariga chiqishi jamoa obro‘siga putur yetkazadi. Prezident bu ma’lumotni kim tarqatganini aniqlashganini ham qo‘shimcha qildi.
To‘qnashuv oqibatida Federico Valverde bosh qismidan jarohat olib, shifoxonaga yotqizilgan edi. Klub shifokorlari unga bosh miya chayqalishi tashxisini qo‘yishdi va futbolchi 10–14 kun davomida dam olishi kerakligi belgilandi.
Aurélien Tchouameni yuz bergan voqea uchun uzr so‘rab, Real Madrid kabi dunyoning eng mashhur klubida bunday xatti-harakatlar nomaqbul ekanini tan oldi. Klub rahbariyati ichki surishtiruvdan so‘ng har ikkala futbolchini 500 ming yevro miqdorida jarimaga tortdi va intizomiy ishni yopilgan deb e’lon qildi.
“Zamin”ni Telegramʻda oʻqing!
