Барселона келаси мавсумда ҳужум чизиғини кучайтириш мақсадида янги ҳужумчи излаш ишларини жадаллаштирди. Каталонияликлар клуби Роберт Левандовски Саудия Арабистонининг Ал-Ҳилал жамоасига ўтиб кетиши кутилаётгани сабабли, унинг ўрнига Челси вакили Жоао Педрони асосий номзод сифатида кўрмоқда. Бу ҳақда Goal.com хабар беради.
Полшалик тажрибали ҳужумчининг кетиши деярли аниқ бўлиб турибди. Барселона спорт директори Деко ёш ва динамик ҳужумчи қидирмоқда. Глобо хабарига кўра, Жоао Педро рўйхатнинг энг юқори қисмида жой олган, шунингдек, Атлетико Мадрид ҳужумчиси Хулиан Альварес ҳам вариантлар қаторида турибди.
Жоао Педро учун трансфер нархи 100 миллион еврогача етиши мумкин. Челси ўзининг 24 ёшли ҳужумчисини осонликча қўйиб юбормоқчи эмас, чунки у жорий мавсумда 51 та ўйинда 23 та гол уриб, жамоанинг асосий фигурасига айланди.
Барселона учун Челси Чемпионлар лигасига чиқа олмагани музокараларда устунлик бериши мумкин. Каталонияликлар футболчи билан келишувни Жаҳон чемпионати бошлангунига қадар якунлашни режалаштирмоқда.
“Zamin”ни Telegram'да ўқинг!
