Ўзбекистонда айрим касалликларга чалинган ҳайдовчиларга хавфсизлик камарини тақмасликка рухсат берилиши мумкин. Соғлиқни сақлаш вазирлиги хавфсизлик камаридан фойдаланмасликка имконият берувчи касалликларнинг рўйхатини тасдиқлаш лойиҳасини эълон қилди.
Ҳужжат жамоатчилик муҳокамасига қўйилган. Рўйхатда 17 та касаллик келтирилган бўлиб, улар орасида кўкрак қафаси, қовурғалар ва умуртқа синиши, астма ва сурункали ўпка касалликларининг оғир шакллари, жиддий юрак касалликлари, учинчи даражадаги семизлик, бўйи жуда паст бўлганлар ҳамда неврологик ва тери касалликлари мавжуд.
Шунингдек, ҳомиладор аёлларга ҳам хавфсизлик камарини тақмаслик рухсат этилиши мумкин. Мазкур касалликларга чалинган фуқароларга «Электрон соғлиқни сақлаш» тизими орқали QR-кодли электрон тиббий маълумотнома берилади.
Бундай маълумотномани фуқаро бириктирилган поликлиникадан олиш мумкин бўлади.
