Роберт Кеннеди Трамп фойдасига президентлик пойгасидан чиқди

^{Фото: AP}
АҚШ президентлигига мустақил номзод кичик Роберт Кеннеди сайлов кампаниясида иштирок этишдан бош тортди ва Республикачилар партиясидан номзод, Оқ уйнинг собиқ раҳбари Дональд Трампни қўллаб-қувватлашини маълум қилди.

Кеннеди 23 август куни Пенсилвания судига президентлик пойгасидан чиқиш тўғрисида ариза билан мурожаат қилган.

“Мен сайловда ғалаба қозониш учун реал имконим борлигига энди ишонмайман”, дейди Кеннеди матбуот анжуманида.
Кеннеди тадбиридан бир неча соат ўтиб, қўшни Глендейлда Трамп сайловолди митинги режалаштирилган эди. Унинг кампанияси аввалроқ тадбирда “махсус меҳмон” иштирок этишини эълон қилган, бироқ икки сиёсатчининг жамоаси бу меҳмон Роберт Кеннеди бўладими-йўқми бу ҳақда маълум қилмаган.

Аввалроқ кичик Кеннеди сайлов бюллетенига қўйиш учун керакли миқдордаги имзоларни топширган эди.

Сўнгги ойларда Кеннеди Трампни ўз тарафдорларига хиёнат қилганликда айблаган. Трамп эса Кеннедини “президентлик пойгасидаги энг радикал сўл номзод” сифатида танқид қилган.

22 август куни Чикагодаги Демократик партиянинг миллий қурултойида АҚШ вице-президенти Камала Ҳаррис АҚШ президентлигига номзод сифатида кўрсатилган номзодликни қабул қилган эди. Шунингдек, Миннесота губернатори Тим Валс демократлардан АҚШ вице-президентлигига номзодликни қабул қилган. “Замин” янгиликларини “Инстаграм”да кузатиб боринг