Қисқа форматдаги видеолар дастлаб смартфонлар учун мўлжалланган бўлса-да, YouTube маълумотларига кўра, улар катта экранларда ҳам жуда оммалашиб бормоқда. Ҳозирги кунда фойдаланувчилар ҳар ой телевизорлар орқали 2 миллиард соатдан ортиқ YouTube Шортс видеоларини томоша қилишмоқда. YouTube компаниясининг таъкидлашича, яшаш хонаси платформанинг энг тез ривожланаётган экрани ҳисобланади. Бу ҳақда Techcrunch.com хабар беради.
YouTube телевизорлар учун Шортс тажрибасини оптималлаштирди. Хусусан, вертикал видеоларни катта экранда кўриш қулай бўлиши учун шарҳлар қисми видео ёнида акс эттириладиган бўлди. Google ТВ платформаси ҳам ўз лентасига "Сиз учун қисқа видеолар" қаторини қўшиб, томоша қилиш вақтини янада оширишни мақсад қилган.
Шунингдек, телевизорларда подкастларни томоша қилиш тенденцияси ҳам кучаймоқда. 2025-йилда фойдаланувчилар ҳар ой яшаш хонасидаги қурилмалар орқали 700 миллион соатдан ортиқ подкаст томоша қилишган, бу 2024-йилдаги 400 миллион соатлик кўрсаткичдан сезиларли даражада юқори. Netflix каби компаниялар ҳам ушбу йўналишга катта сармоя киритиб, турли студиялар билан эксклюзив келишувларга эришмоқда.
“Zamin”ни Telegram'да ўқинг!
