Американинг бир қатор шаҳарларида ноқонуний муҳожирларни оммавий депортация қилишга қарши норозилик намойишлари бўлиб ўтди. Бу ҳақда маҳаллий KTLA телеканали хабар берди.
Энг йирик намойиш Лос-Анжелесда кузатилган. Минглаб фуқаролар президент Доналд Трампнинг иммиграция сиёсатига қарши чиқиб, шаҳарнинг тарихий марказидаги кўчалар ва 101-трассани тўсиб қўйишди.
Телеканал маълумотига кўра, Калифорниянинг жанубий ҳудудларида ва АҚШнинг бошқа қисмларида ҳам шу каби намойишлар ташкил этилган. Намойишчилар янги миграция сиёсати натижасида мамлакатдан чиқариб юборилиши мумкин бўлган муҳожирларни қўллаб-қувватлаган.
Newsweek нашрининг ёзишича, норозилик чиқишлари Арканзас, Миссури ва Жоржия штатларида ҳам кузатилган. Бироқ, Техас ва Калифорния шаҳарларидаги намойишлар айниқса кескин тус олган.
Трамп маъмуриятининг депортация сиёсати
АҚШ чегара хавфсизлиги бўйича масъул шахс Том Ҳоманнинг маълум қилишича, Доналд Трамп президентликка қайтганидан сўнг биринчи ҳафтада 4 мингдан зиёд муҳожир депортация қилинган.
Маълумотларга кўра, Жо Байден президентлиги даврида АҚШнинг жанубий чегарасидан ноқонуний кириб келган муҳожирлар сони рекорд даражага етган. Чегара қўриқлаш хизмати маълумотларига кўра, 2021 йил январидан буён 8 миллиондан ортиқ муҳожир ҳужжатсиз равишда АҚШга кириб келган.
Трампнинг янги чора-тадбирлари
20 январь куни Доналд Трамп АҚШнинг 47-президенти сифатидаги илк нутқини сўзлаб, ноқонуний муҳожирларнинг кириб келишини зудлик билан тўхтатиш ва оммавий депортация жараёнини бошлаш ниятида эканлигини билдирди. Шунингдек, у мамлакатнинг жанубий чегарасидаги вазият туфайли бутун АҚШ бўйлаб фавқулодда ҳолат эълон қилганини маълум қилди.
Ушбу қарор жамоатчилик ўртасида турли баҳсларга сабаб бўлди. Бир тарафдан, Трамп қонун устуворлигини таъминлаш ва чегара хавфсизлигини кучайтиришга ҳаракат қилаётганини таъкидлайди. Бошқа тарафдан, минглаб одамлар бу сиёсат инсон ҳуқуқларига зид эканлигини ва муҳожирларнинг оғир ҳолатга тушиб қолишига олиб келишини таъкидлаб, кўчаларга чиқишда давом этмоқда.
“Замин” янгиликларини “Telegram”да кузатиб боринг
