Россия президентининг хорижий давлатлар билан иқтисодий ҳамкорлик бўйича махсус вакили ҳамда Россия тўғридан тўғри инвестициялар жамғармаси раҳбари Кирилл Дмитриев CNN телеканали орқали эфирда қилган чиқишида Украина президенти Володимир Зеленскийнинг сўзларини “дипломатик ечимга яқинлашиш” деб атади.
Дмитриевнинг таъкидлашича, Зеленскийнинг фронт чизиғида урушни тўхтатиш ҳақидаги гаплари сўнгги ойлардаги сиёсий риторикада жиддий бурилиш ҳисобланади. Унинг фикрича, Украина раҳбари аввал Россия қўшинларини бутун ҳудуддан чиқаришни талаб қилган бўлса, бугун у анча мулоҳазали позицияни танлаётгандек кўринади.
“Менимча, Россия, АҚШ ва Украина дипломатик ечимга яқинлашмоқда. Зеленскийнинг фронт чизиғи ҳақидаги баёноти — катта ва илк ҳақиқий қадам,” — деди Дмитриев журналист Жейк Таппер билан суҳбатда.
Шу билан бирга, у Москванинг “хавфсизлик кафолатлари” ҳақидаги талабларини ҳам такрорлади ва урушни тўхтатиш учун Кремлнинг манфаатлари инобатга олиниши кераклигини урғулаб ўтди.
Дмитриевдан АҚШ президенти Доналд Трампнинг Будапештда Владимир Путин билан режалаштирилган учрашувни бекор қилиш қарори ҳақида ҳам сўрашди. Россия вакили “учрашув барибир бўлади, фақат кейинроқ” дея жавоб берди. Унинг сўзларига кўра, “Россия билан мулоқотни тўхтатиш эмас, уни давом эттириш муҳим”.
Трамп ҳам ўз чиқишларида “Путин билан суҳбатлар фойдали, аммо улар етарлича натижа бермаяпти”, деб таъкидлаган эди.
Шу билан бирга, Дмитриев АҚШ ва Россия маҳбуслар алмашинувини давом эттириш масаласини муҳокама қилаётганини маълум қилди. Унинг айтишича, бу “одатий дипломатик жараён эмас”, балки икки давлат ўртасидаги ишончни тиклаш йўлидаги муҳим қадам ҳисобланади.
Москва эса Дмитриевнинг ташрифига қадар Украинада фронт чизиғи бўйича жангларни “дарҳол музлатиш” таклифини рад этганди. Россия ТИВ раҳбари Сергей Лавров бу фикрни “Аляскада эришилган келишувларга зид” деб баҳолаган ва бундай қарор “нацистик режим қўлидаги ҳудудларни мустаҳкамлаб қўйиши”ни таъкидлаган.
Таҳлилчиларга кўра, Зеленскийнинг охирги баёноти ғарб сиёсий доираларида ҳам қизиқиш уйғотди. Унинг “фронтдаги вазиятни дипломатик йўл билан ҳал этиш мумкин” деган ифодани Украина позициясида эҳтимолий юмшаш белгиси сифатида кўрилмоқда.
Шу билан бирга, Россия тарафидан ҳали аниқ амалий қадамлар кузатилмаяпти. Дмитриевнинг “ҳамкорликсиз тинчлик бўлмайди” деган фикри эса Кремлнинг бу жараёнда фақат ўз шартлари асосида иштирок этиш ниятидан дарак бермоқда.
Сиёсий кузатувчилар бу баёнотларни Украина–Россия можаросидаги “сўзлар орқали босим” босқичи сифатида баҳоламоқда. Уларга кўра, Зеленскийнинг бу йўналишдаги мулоҳазалари тинчлик учун эмас, балки Ғарб давлатларининг янги ёрдам пакетларини олишдан аввалги дипломатик манёвр бўлиши ҳам мумкин.
