“Барселона” клуби Испания чемпионатининг энг муҳим баҳсларидан бири — “Эль-Класико” олдидан жиддий тайёргарлик кўрмоқда. Испания матбуоти маълумотларига кўра, каталонияликларнинг бош мураббийи Ханси Флик жамоани “Реал Мадрид”га қарши ўзига хос, жуда ҳужумкор услубда майдонга туширишни режалаштирган.
Diario Sport нашри ёзишича, Фликнинг тактик режаси анъанавий эҳтиёткорликдан йироқ. Германиялик мутахассис жамоани рақиб кучли бўлишига қарамасдан тўлиқ ҳужумга йўналтирмоқчи. Унинг фикрича, “Барселона” ғалаба қозониш учун фақат ҳужумда фаол бўлиши шарт. Шунинг учун у марказий чизиқда юқори прессинг ва қанотлардаги тезкор юришларга асосланган схема устида ишлаяпти.
“Флик жамоа тўпни назорат қилиб туриб, рақибни ўз майдонига қамаб қўйишни истаяпти. Унинг мақсади — мадридликларнинг тезкор қарши ҳужумларини чеклаб, рақиб ҳимоясини кучли босим билан синаб кўриш,” — деб ёзади нашр.
Германиялик мураббий ўзи ўйинда иштирок эта олмасада (дисквалификация сабабли), жамоа олдидаги режаларни аниқ белгилаб берган. У ўйин давомида ёрдамчилар орқали тактик ўзгаришларни амалга оширишни режалаштирмоқда.
Манбаларнинг таъкидлашича, Флик “Эль-Класико” учун ўзига хос комбинациялар тайёрлаган. Ҳужумда асосий эътибор Левандовски ва Ямал дуэтига қаратилади. Улар қанотлар орқали тезкор ҳужумларни ташкил этган ҳолда рақиб ҳимоясини очишлари керак бўлади. Шу билан бирга, хавфли стандарт ҳолатларда Кунде ва Кристенсен иштирок этиши режалаштирилган.
“Барселона”да марказий ярим ҳимоячилар орқали тез паслар ва позицион ҳужумлар орқали рақибни чарчатиш вазифаси қўйилган. Бу эса мадридликлар ҳимоясини бузиш ва Мбаппе ҳамда Винисиус каби тезкор ҳужумчиларнинг орқа чизиққа чиқишини чеклашга ёрдам беради.
Шунингдек, Флик ёрдамчилари орқали жамоага руҳий тайёргарлик бўйича ҳам алоҳида кўрсатмалар берган. Унинг фикрича, “Эль-Класико”да нафақат техника ёки тактика, балки руҳият ҳам ҳал қилувчи аҳамиятга эга бўлади.
“Барселона” бу баҳсни ютса, Ла Лигада пешқадамликни қўлга киритиши мумкин. Ҳозирда “Реал Мадрид” 24 очко билан биринчи ўринда бормоқда, каталонияликлар эса улардан 2 очко орқада.
“Эль-Класико” 26 октябрь куни Тошкент вақти билан соат 20:15 да “Сантяго Бернабеу”да бўлиб ўтади. Испаниядаги бу ўйин нафақат чемпионлик пойгаси учун, балки икки клубнинг нуфузи учун ҳам ўта муҳим аҳамият касб этади.
“Zamin”ни Telegram'да ўқинг!
