АҚШ БМТ Инсон ҳуқуқлари кенгаши ва UNRWA таркибидан чиқди

Доналд Трамп Қўшма Штатларни БМТ Инсон ҳуқуқлари кенгаши ва БМТнинг Яқин Шарқдаги Фаластинлик қочқинларга ёрдам ишлари агентлиги (UNRWA) таркибидан чиқариш ҳақидаги фармонни имзолади. Бу ҳақда 4 феврал, сешанба куни Оқ уй матбуот хизмати, шунингдек, AFP ва dpa агентликлари хабар берди.

^{Фото: Getty images}
Оқ уй: БМТда «Америкага қарши тарафкашлик» ҳукмрон

AFP таъкидлаганидек, Трампнинг фармони АҚШнинг БМТнинг Таълим, фан ва маданият масалалари бўйича ташкилоти (ЮНEСКО)даги иштирокини қайта кўриб чиқишни ҳам назарда тутади. Агентлик Оқ уйнинг янги котиби Уилл Шарфнинг БМТ институтларида «Америкага қарши тарафкашлик» ҳақидаги гапидан иқтибос келтиради.

«Умуман олганда, фармон мамлакатлар ўртасидаги катта тафовутлар ва молиялаштириш даражасидан келиб чиқиб, АҚШ томонидан БМТга ажратилаётган маблағларни қайта кўриб чиқишни талаб қилади», — дея қўшимча қилди Шарф.

«Мен доимо Бирлашган Миллатлар Ташкилотининг катта салоҳиятга эга эканлигини ҳис қилганман. Аммо ҳозир у бу салоҳиятга мос келмаяпти, - деди Доналд Трамп ҳужжатни имзолар экан. - У унчалик яхши ишламаяпти ва у ўз ишини қилмаяпти».

АҚШ UNRWA учун энг йирик донор эди

Исроил 2023 йил 7 октябрда Ҳамаснинг Исроилга ҳужумига алоқадорликда айблаганидан сўнг, Жо Байден даврида АҚШнинг UNRWA'ни молиялаштириши 2024 йил январида тўхтатилган эди. Шу билан бирга, АҚШдан кейин яна ўндан ортиқ ривожланган давлатлар, хусусан, Германия, Буюк Британия, Япония ва Австралия UNRWA'ни молиялаштиришни тўхтатди. Канада, Швеция ва Италия тўловларни бекор қилди, аммо кейинроқ тўловларни қайта бошлади.

Илгари Қўшма Штатлар UNRWA'нинг энг йирик донори бўлиб, ҳар йили 300-400 миллион доллар ажратган. Трампнинг 2017-2021 йиллардаги биринчи муддати давомида у UNRWA'ни молиялаштиришни тўхтатиб қўйган эди. “Замин” янгиликларини “Telegram”да кузатиб боринг