Доналд Трамп учинчи муддат ҳақида гапирди ва янги божлар жорий этиши мумкин

АҚШ президенти Доналд Трамп учинчи муддатга сайланиш эҳтимолини истисно этмади. 30 март куни NBC телеканалига берган интервюсида у "кўп одамлар буни хоҳлашини" ва буни амалга ошириш учун "усуллар борлигини" таъкидлади. "Аммо олдимизда узоқ йўл бор. Мен бор эътиборимни ҳозирги дақиқага қаратганман", — дея қўшимча қилди у. Бироқ телеканал мазкур интервьюнинг тўлиқ ёзувини эълон қилмасдан, стенограмма парчаларинигина тақдим этди.

Трамп ҳокимиятда қолиш учун қандай аниқ механизмлардан фойдаланиши мумкинлиги ҳақида саволга жавоб беришдан бош тортди. Бироқ у журналист томонидан таклиф этилган версияни рад этмади. Унга кўра, АҚШнинг вице-президенти Жей Ди Вэнс 2028 йилда сайловда ғалаба қозониши ва кейинчалик бу лавозимни Трампга топшириши мумкин.

Янги божлар жорий этилиши мумкин

Шунингдек, Трамп маъмурияти яқин ҳафталар ичида мис импортига божлар жорий қилиш имкониятини кўриб чиқмоқда. Бу ҳақда Bloomberg агентлиги манбаларга таяниб хабар берди.

"Маъмурият (Трамп маъмурияти) тезкор текширув ўтказмоқда ва қарор 270 кунлик муддат тугашидан анча олдин қабул қилиниши мумкин", — деди агентлик манбалари.

Bloomberg таъкидлаганидек, феврал ойида АҚШ президенти Трамп Савдо вазирлигига мис импортига божлар жорий этиш имкониятини ўрганиш ва 270 кун ичида ҳисобот тайёрлашни топширган.

Венесуэла нефтига чекловлар

24 март куни Трамп АҚШ 2 апрелдан бошлаб Венесуэладан нефт ёки газ сотиб олувчи давлатларга 25 фоизлик импорт божлари жорий этишини маълум қилди. У бу чораларни "иккинчи даражали божлар" деб атади. Трампнинг сўзларига кўра, бу чекловлар Венесуэланинг АҚШга жиноятчилар ва халқаро уюшган жиноий гуруҳлар аъзоларини юбориши билан боғлиқ.

Пўлат ва алюминийга божлар

17 март куни Трамп Қўшма Штатлар 2 апрелдан бошлаб истисноларсиз пўлат ва алюминийга божлар жорий этишини маълум қилди. Унинг таъкидлашича, бу божлар бошқа давлатлар томонидан Америка товарларига жорий қилинаётган импорт тўловларига тенг бўлади.

Бу чора-тадбирлар Трамп маъмуриятининг иқтисодий сиёсатини қатъийлаштиришга қаратилгани билан изоҳланмоқда. Унинг танқидчилари эса бу ҳаракатларни протекционистик йўналишдаги сиёсат деб баҳоламоқда. “Замин” янгиликларини “Telegram”да кузатиб боринг