Янги Зеландияда 13 ёшли ўсмир интернет орқали сотиб олган магнитлар туфайли оғир жарроҳлик амалиётига дуч келди. The Guardian ёзишича, бола тахминан 100 та кучли неодим магнитни ютиб юборганидан сўнг шифокорлар унинг ичагидан уларни чиқариш учун операция ўтказишган.
Тўрт кун давомида кучли қорин оғриғидан азият чеккан ўсмир Тауранга шифохонасига ётқизилган. Рентген натижаларида магнитлар ичак деворини кесиб ўтгани ва бир неча жойда тўқима некрозига сабаб бўлгани аниқланган.
Шифокорлар маълум қилишича, бола ютиб юборган магнитлар юқори кучга эга бўлиб, улар ичак ичида бир-бирига тортилиб, орган деворларини зарарлаган. Операция пайтида жарроҳлар ингичка ва йўғон ичакнинг бир нечта қисмидаги ўлик тўқималарни олиб ташлаган. Боланинг ҳаётини сақлаб қолиш учун операция беш соатдан ортиқ давом этган.
Қизиғи шундаки, бу турдаги магнитлар Янги Зеландияда 2013 йилдан буён сотилиши тақиқланган. Аммо ўсмир уларни онлайн савдо майдони Temu орқали харид қилган. Компания бу ҳолат бўйича ички текширув бошланганини маълум қилди.
“Ҳозирда текширув жараёни кетмоқда. Магнитлар айнан Temu орқали сотиб олингани ҳозирча расман тасдиқланмаган, аммо барча хавфли маҳсулотлар рўйхати қайта кўриб чиқилмоқда”, — дейилган компания баёнотида.
Мутахассислар таъкидлашича, бундай ҳолатлар кейинчалик ичак тутилиши, чурра ва доимий оғриқлар каби оғир асоратларга сабаб бўлиши мумкин. Шу боис, улар ота-оналарни кичик болалар ва ўсмирларнинг онлайн буюм харидларига жиддий эътибор қаратишга чақирмоқда.
“Zamin”ни Telegram'да ўқинг!
