Бугунги кунда дунё бўйлаб ишлаб чиқарилаётган озиқ-овқатнинг учдан бир қисми истеъмолчиларга етиб бормасдан чиқиндига айланади. Бу нафақат иқтисодий йўқотиш, балки экологик муаммо ҳамдир. Ҳисоб-китобларга кўра, ташлаб юборилаётган маҳсулотлар ҳар йили триллионлаб доллар зарар келтирмоқда.
Озиқ-овқат чиқиндиларининг энг катта қисми ресторанлар, савдо марказлари ва уй хўжаликларида пайдо бўлади. Одамлар кўпинча кераклигидан ортиқ овқat тайёрлайди ёки муддати ўтган маҳсулотни дарҳол ташлаб юборади. Аслида эса бу маҳсулотларнинг аксарияти ҳали истеъмол қилишга яроқли бўлади.
Мутахассисларнинг таъкидлашича, озиқ-овқат чиқиндиларини камайтириш орқали иссиқхона газларини ҳам сезиларли даражада камайтириш мумкин. Чунки ишлаб чиқарилган, аммо истеъмол қилинмаган озиқ-овқатнинг ҳар бир килограмми ишлаб чиқариш, ташиш ва сақлаш жараёнида катта энергия сарфини талаб қилади.
Айрим давлатларда бу муаммони камайтириш учун махсус дастурлар жорий этилган. Масалан, Францияда ресторан ва дўконларга сотилмаган озиқ-овқатни хайрия ташкилотларига топшириш мажбурияти юклатилган. Шунга ўхшаш ташаббуслар кўплаб мамлакатларда ҳам йўлга қўйилмоқда. Оддий одамлардан тортиб, тадбиркорларгача ҳар ким исрофга чек қўйса, бу нафақат иқтисодиёт, балки табиат учун ҳам фойдали бўлади. Зеро, ҳар бир нон бўлаги меҳнат, сув ва энергия билан яратилган бойликдир.
