Лондонда сўнгги ойларда кутилмаган, ҳатто бироз кулгили тенденция шаклланяпти: ўғирланган Android смартфонлари айни ўғриларнинг ўзи томонидан эгаларига қайтариб бериляпти. Бу ҳақда London Centric нашри манзилли таҳлил бериб, бир нечта воқеаларни жамлаб чиқди.
Энг қизиғи — бу “меҳрибонлик” фақат Android қурилмаларига тегишли. iPhone’га келганда эса ҳеч қандай инсоф кутмасангиз ҳам бўлади. Айтишларича, ўғирлар айнан Apple смартфонларини қимматроқ ва қора бозорда сотиш учун жозибадорроқ деб ҳисоблайди.
Манба бир неча эътиборга молик воқеаларни келтиради.
Биринчи ҳикояда электр велосипедда ҳаракатланаётган жиноятчи йўловчининг қўлидан Samsung Galaxy’ни тортиб олишга ҳаракат қилади. Лекин моделни таниб, унинг андроид эканини англагач, телефонни ерга ташлаб, қочиб кетади. Гўё аппарат унинг “меҳнатига арзимаган”дай.
Иккинчи ҳолатда ўғри аввал йўловчига дўстона ёндашган, аммо у Android смартфон ишлатишини билганидан кейин қизиқишини оҳиста йўқотиб, ҳеч нарса олмасдан узоқлашган.
Учинчи воқеа эса янада ҳайратланарли: саккиз кишидан иборат гуруҳ бир фуқарога ҳужум қилиб, унинг мол-мулкини қўлга киритади. Аммо ҳужумчилардан бири ўша жабрланувчига Samsung қурилмасини қайтариб бериб, гўё “бу бизга керак эмас” дегандек жим кетиб қолган.
Мутахассислар бунинг изоҳини қора бозордаги талаб билан боғлайди. iPhone’лар йирик пулга сотилиши, қайта тикланган ҳолда ҳам тез ўтиши мумкин. Android смартфонлар эса жиноятчилар кўзида анча арзон, баъзан ҳатто қийматига арзимайдиган қурилма сифатида кўрилаяпти.
Қисқаси, Лондонда ҳозирги кунда шундай манзара: агар телефонингиз Android бўлса — “бақириб кутинг”, қайтиб келиши эҳтимоли баланд. Агар iPhone бўлса, афсус, бу ерда ҳатто ўғрилар ҳам танловда принципиал.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
