Қирғизистонда 19 ёшли қиз севгилисининг тилини тишлаб, узиб олди
Қирғизистоннинг Манас туманида 19 ёшли қиз ўпишиш пайтида 26 ёшли севгилисининг тилини тишлаб, унинг бир қисмини узиб олди. Йигитнинг тил учи ва пастки лаби шикастланиб, унга дарҳол жарроҳлик амалиёти ўтказилди. Терговга кўра, воқеадан олдин улар тўйда спиртли ичимлик истеъмол қилган, ҳар иккисида ҳам руҳий касаллик ёки онг бузилиши белгилари аниқланмаган. Манас туман Ички ишлар бўлими жиноят ишини очиб, суд-тиббий экспертиза тайинлади.
Қирғизистоннинг Манас туманида 8 ноябрь куни кўпчиликни ҳайратга солган воқеа содир бўлди. 19 ёшли қиз ўпишиш пайтида ўзидан етти ёш катта севгилисининг тилини тишлаб, унинг бир қисмини узиб олди, деб ёзади “Kaktus.media”.
Жалолобод вилояти клиник шифохонаси директори Қумар Ботокараев маълумотига кўра, йигит оғир аҳволда шифохонага келтирилган. “Беморнинг тил учи ва пастки лаб қисми шикастланган. Дарҳол жарроҳлик амалиёти ўтказилди ва ҳозир у даволанмоқда. Тилни тиклаш имкони бор. Бундай ҳолат ўпишиш пайтида илк бор кузатилмоқда”, — деди шифокор.
Тергов маълумотларига кўра, 26 ёшли йигит ва 19 ёшли қиз тўйда бирга бўлиб, спиртли ичимлик истеъмол қилишган. Ўпишиш пайтида қиз кутилмаганда уни тишлаб олган. Ҳар иккисида ҳам руҳий касаллик ёки онг бузилиши белгилари аниқланмаган.
Манас туман Ички ишлар бўлими ҳолат юзасидан жиноят ишини очди. Суд-тиббий экспертиза тайинланди, суриштирув ишлари давом этмоқда.
Эслатиб ўтамиз, яқинда Туркияда ҳам жиноий муҳаббат асосида содир этилган қотиллик жамиятда катта шов-шувга сабаб бўлган эди.
Изоҳлар 0
…