АҚШ ва Германия ўртасидаги муносабатлар кескинлашмоқда: экстремистик партия сабаб жанжал келиб чиқди

АҚШнинг юқори мартабали расмийлари Германиядаги ўта ўнг қанотга мансуб «Германия учун муқобил» партиясининг (АдГ) экстремистик ташкилот деб тан олинишини кескин қоралаб чиқишди. Уларнинг бу баёнотлари расмий Берлин томонидан асоссиз ва ўринсиз айблов сифатида баҳоланмоқда.

Масаланинг келиб чиқишига сабаб, Германиянинг Конституцияни муҳофаза этиш бўйича федерал идораси (BfV) АдГ партияси фуқароларни миллат ва жойлашувига қараб ажратаётгани ва бу билан мамлакатнинг бирлигини бузишга ҳаракат қилмоқда деган хулосага келганидадир.

Жорий йил февраль ойида ўтказилган федерал сайловларда ушбу партия сайловчиларнинг қарийб бешдан бир қисмининг овозини олиб, 630 ўринли парламентда 152 мандатга эга бўлган эди. Партиянинг асосий платформаси миграция масалаларида қаттиқ позицияда туриши билан боғлиқ бўлиб, улар кўпинча миллатчилик руҳидаги қарашларни қўллаб-қувватлайди. Германиядаги бошқа йирик сиёсий партиялар эса, мамлакатда миллатчиликнинг тарқалишига йўл қўймаслик учун АдГни ҳукумат коалициясига киритишдан қатъий равишда бош тортиб келади.

Партиянинг экстремистик деб тан олиниши АҚШнинг Трамп маъмуриятига ёқмади ва жиддий эътирозлар туғдирди. Хусусан, вице-президент Жей Ди Вэнс Германия ҳукумати совуқ уруш рамзи бўлган Берлин деворини қайта тикламоқчи, деган кескин иддао билан чиқди. Давлат котиби Марко Рубио эса Германиянинг бу қарорини «тирания» деб атади.

Бу каби қаттиқ баёнотларга Германия ташқи ишлар вазирлиги ижтимоий тармоқлар орқали тезда жавоб қайтариб, «Германия учун муқобил» партиясининг экстремистик тузилма сифатида тан олиниши демократияни ҳимоя қилиш заруратидан келиб чиққанини тушунтирди.

«Германиянинг тарихий тажрибаси мамлакатимизда ўнг экстремизмнинг қайта кучайишига йўл қўйиб бўлмаслигини кўрсатади», — дейилади вазирлик томонидан берилган баёнотда.

Расмий Берлин бу билан 1933 йилда Адолф Ҳитлер бошчилигидаги миллатчи кучларнинг ҳокимият тепасига келганини эслатиб ўтган бўлса ажаб эмас.

Америка ва Германия ўртасида юзага келган бу дипломатик тортишув икки томонлама муносабатларда юзага келган ёриқнинг бир кўриниши бўлиб турибди. Яқинда АҚШ вице-президенти Жей Ди Вэнснинг 14 февраль куни Мюнхенда бўлиб ўтган хавфсизлик конференциясида Европа давлатлари етакчиларига юзланиб, худди мактаб ўқитувчисидек муносабатда бўлиши ҳам европалик расмийларнинг жиддий ғазабини қўзғатганди.

Шу кунларда икки мамлакат ўртасида бож сиёсати масаласида ҳам жиддий низолар келиб чиқмоқда, Трамп маъмурияти Европага қарши иқтисодий уруш ҳолатидаги сиёсати билан ўзига хос тарангликни кучайтириб бормоқда. Бу эса икки давлат ўртасидаги муносабатларнинг келажаги учун хавотирларни янада кучайтирмоқда. «Замин»ни Telegram’да ўқинг!