Сесам кўчаси Netflix’га кўчди: Трамп қарори ортидан янги шартнома

Машҳур болалар дастури “Сесам кўчаси” энди Netflix стриминг платформасида намойиш этилади. Бу янгилик АҚШ Президенти Дональд Трамп давлат маблағларини Оммавий Телерадио Хизматларига (PBS) тўхтатиш ҳақидаги қароридан кейин эълон қилинди. Netflix ўз баёнотида “Сесам кўчаси”ни болалар медиа оламидаги “севимли ва аҳамиятли бурчак” деб таърифлаб, унинг ёшлар қалбида билимга бўлган муҳаббатни уйғотишини таъкидлади.

Мазкур келишувга кўра, Netflix ўзининг 300 миллионлик обуначисига дастурнинг янги мавсуми ва 90 соатлик архив эпизодларини тақдим этади. Шу билан бирга, “Сесам кўчаси” ҳануз PBS орқали ҳам эфирга узатилади.

Дастур келажаги хавф остида эди, чунки унинг аввалги медиашарикларидан бири — Warner Bros Discovery унинг трансляция ҳуқуқини янгиламасликка қарор қилган эди. Бу компанияга HBO платформаси тегишли бўлиб, у орқали “Сесам кўчаси” эфирга узатилган.

Айни пайтда, Президент Трамп PBS ва Миллий Оммавий Радио (NPR) тармоқларини “бир томонлама ва сиёсий ёндошувда” айблаб, уларни молиялаштиришни тўхтатиш ҳақидаги фармонни имзолади. Бу қарор ортидан, ушбу икки медиа тармоқни қўллаб-қувватловчи давлат агентлиги — Оммавий Телерадио Корпорацияси болалар учун мўлжалланган кўрсатувлар маблағлаштирилишини бекор қилди.

Янги келишув асосида, PBS Netflix’да чиқадиган “Сесам кўчаси” эпизодларини айнан шу куни эфирга узатиш ҳуқуқига эга бўлади.

“Сесам кўчаси” дастури илк бор 1969 йил 10 ноябрда намойиш этилган. Лойиҳа асосчиларидан Ллойд Моррисетт ва Жоан Ганц Куни Гарвард Университети Таълим факультетини жалб этган ҳолда, болаларга билим беришнинг ноанъанавий усулини яратдилар. Психологлар гуруҳи болалар ривожланиш психологиясини таҳлил қилган ҳолда, қизиқарли ва тарбиявий кўрсатувни ишлаб чиқишди. Улар машҳур қуғирчоқлар яратувчиси Жим Ҳенсон билан ҳамкорликда Биг Бёрд каби қаҳрамонларни яратдилар. Декорация эса шаҳар кўчаси кўринишида тайёрланган эди.

Йиллар мобайнида бу дастур бир неча авлод болаларини тарбиялади. “Сесам кўчаси” қаҳрамонлари кичик экрандан ташқарида ҳам катта таъсирга эга бўлди. Масалан, 2002 йили Элмо АҚШ Конгрессида мусиқа таълими тўғрисида сўзлаган. 2006 йилда эса мамлакатда болалар семизлиги муаммоси ортиши билан дастурда соғлом овқатланиш ва жисмоний фаоллик мавзуларига бағишланган “Health Habits” номли сегментлар намойиш этилди. Cookie Monster эса печенье “баъзан ейиладиган озуқа” эканини таъкидлаб, болаларга мувозанатли парҳез ҳақида таълим берди.

Қолаверса, собиқ биринчи хоним Мишель Обама ҳам “Сесам кўчаси” студиясига ташриф буюриб, соғлом овқатланиш мавзусидаги роликда иштирок этган.

Netflix ўз контентида болалар учун мўлжалланган лойиҳаларга катта эътибор қарата бошлади. Бугунги кунда стриминг платформаси томошаларининг тахминан 15 фоизи болалар контентига тўғри келади. Шу билан бирга, Netflix Пеппа Пиг мультфильмининг янги қисмлари ва болалар учун мўлжалланган ранг-берадиган, топишмоқ ва ўйинлардан иборат мобиль ўйин чиқарилишини ҳам эълон қилди. Бу мультфильм тўрт ёшли Пеппа исмли чўчқа ва унинг оиласи ҳақида бўлиб, у Британиядаги ўйма-ўйма шаҳарчада яшайди.

Шундай қилиб, “Сесам кўчаси” янги платформада янги ҳаётга қадам қўймоқда — эскидан таниш кўрсатувимиз энди замонавий рақамли майдонда болаларга таълим ва тарбияни давом эттиради. «Замин»ни Telegram’да ўқинг!