Медведев: “Tomahawk” етказилиши Трамп учун ҳам хавфли

Россия Хавфсизлик кенгаши раиси ўринбосари Дмитрий Медведевнинг таъкидлашича, Украинага “Tomahawk” ракеталарининг эҳтимолий етказиб берилиши барча тарафлар учун салбий оқибатларга олиб келиши мумкин. Унга кўра, бу ҳолат, аввало, АҚШ президенти Дональд Трампнинг ўзига ҳам ёмон тугайди.

Медведев Трампнинг сўзларини эсга олди — у Россия президенти Владимир Путин Украина можаросини ҳал этмаса, бу унинг учун ёмон оқибатларга олиб келиши ҳақида таҳдид қилган эди.

“Агар тинчлик ҳақида гапираётган “бизнесмен” “Томагавклар”ни назарда тутган бўлса, бу нотўғри ёндашув. Бу ракеталарни етказиб бериш ҳамма учун ёмон якунланади. Ва, биринчи навбатда, Трампнинг ўзи учун”, — деб ёзди Медведев ўзининг Telegram-каналида.

Эслатиб ўтамиз, Трамп аввалроқ можаро ҳал этилмаса, АҚШ Украинага “Tomahawk” ракеталарини тақдим этиши мумкинлигини билдирган эди.

Чарос Заркараева

«ZAMIN.UZ» муҳаррири