Telegram мессенжерида Павел Дуровга ўхшаш қаҳрамон иштирок этадиган янги ўйин пайдо бўлди. Ушбу ўйинда бош қаҳрамон француз қамоқхонасидан қочиб, йўлда шубҳали шахслар билан тўқнашади.
Ўйин Telegram асосчиси Павел Дуров билан боғлиқ бўлмаса-да, у ушбу лойиҳа ҳақида ўзининг расмий каналида гапириб, унга ҳавола улашди. "Кимдир менинг француз қамоқхонасидан қочаётганим ҳақида ўйин яратибди.
Йўлда турли шубҳали шахслар билан тўқнашибман. Буни ўзингиз синаб кўринг!
Фақат Telegramда мустақил дастурчилар бундай нарса қилиши мумкин", – деб ёзди Дуров. Дуровнинг сўзларига кўра, у бу лойиҳа ҳақида олдиндан ҳеч нарса билмаган ва унда иштирок этмаган.
"Лойиҳа муаллифларига ҳурмат", – дея қўшимча қилди Telegram асосчиси. Total Glitch номли ушбу ўйин мустақил дастурчилар томонидан яратилган ва Mini App платформасида ишлайди.
Бу восита мессенжер ичида қўшимча дастурлар ва ўйинларни ўрнатмасдан ишга тушириш имконини беради. Ўйин муаллифларининг фикрига кўра, унда ўйинчи қамоқдан қочиш ва турли душманларга қарши курашиш орқали эркинликка эришиши керак бўлади.
Дуровнинг ушбу ўйин ҳақидаги пости ижтимоий тармоқларда тез тарқалиб, фойдаланувчилар томонидан "йилнинг энг кутилмаган Telegram рекламалари" сифатида баҳоланди. Маълумки, Telegram асосчиси Павел Дуровнинг француз ҳуқуқ-тартибот идоралари билан муносабатлари доим мураккаб бўлган.
2024-йилнинг августида уни Telegramдаги контентни "етарлича модерация қилмаслик" бўйича иш доирасида Францияда ҳибсга олиб, бир неча кун давомида сўроқ қилишган. Дуров тўрт кун ҳибсда қолган ва кейинчалик гаров эвазига озод қилинган.
Кейинчалик, Дуров бир неча бор Францияни, фуқароси бўлишига қарамай, сўз эркинлигига тажовуз қилишда айблаган.
