Японияда технология ва инсон муносабатларига оид ғайриоддий воқеа жамоатчилик муҳокамасига сабаб бўлди. 32 ёшли Юрина Ногучи видеоўйин қаҳрамони асосида яратилган сунъий интеллект (СИ) билан рамзий никоҳ маросимини ўтказди.
Колл-марказ оператори бўлиб ишлайдиган Ногучи ChatGPT асосида ишлайдиган Люн Клаус Вердюр номли рақамли персонажни ўзи яратган. Никоҳ маросимида келин оч пушти рангли либос кийиб, “куёв” образини ақлли кўзойнак орқали кўрган.
Маълум бўлишича, барчаси аёлнинг муваффақиятсиз унаштируви ҳақида ChatGPT’дан маслаҳат сўрашидан бошланган. Чатбот муносабатларни тугатишни тавсия қилган ва Ногучи шундан сўнг видеоўйин қаҳрамонининг сунъий интеллектга асосланган версиясини яратишга қарор қилган. Улар кунига 100 мартагача хабар алмашиб турган.
Окаяма шаҳрида бўлиб ўтган маросим рамзий анъаналарга мувофиқ ўтказилган. СИ овозга эга бўлмагани сабабли, унинг никоҳ қасамёди ташкилотчи томонидан ўқиб эшиттирилган. Ушбу никоҳ Япония қонунчилигига кўра ҳуқуқий кучга эга эмас.
Ногучининг қарори ижтимоий тармоқларда турли баҳсларга сабаб бўлди. Мутахассислар эса бундай ҳолатларни чатботларга ҳаддан ташқари боғланиб қолиш билан изоҳламоқда. Аёлнинг ўзи эса сунъий интеллект билан муносабатларини реал ҳаёт билан мувозанатда сақлашга ҳаракат қилаётганини таъкидлаган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
