АҚШнинг Нью-Йорк штатида олимлар Ер юзида 450 миллион йил аввал яшаган, илгари умуман номаълум бўлган денгиз мавжудотининг ажойиб “олтин” қолдиқларини топишди. Янги турга Lomankus edgecombei номи берилди.
Археологик топилмаларнинг энг ҳайратланарлиси — бу организмлар анъанавий қолдиқлардан фарқли равишда деярли идеал ҳолда сақланиб қолгани. Миллионлаб йиллар давомида уларнинг кичик танаси металл — пирит билан аста-секин алмашиб борган, натижада шакл ва анатомия амалда ўзгармаган.
Оксфорд университети палеобиологи Люк Пэррининг таъкидлашича, пирит кислородсиз муҳитда бактериялар органик тўқималарни парчалаганида ҳосил бўлади. Бундай шароитда ажралган газлар темир билан реакция қилиб сульфидни шакллантиради.
“Бу намуналар гўё пирит ҳосил бўлиши учун махсус таёрланган миниатюра оролчаларга ўхшайди”, — дейди Пэрри.
Мутахассислар ўта аниқ, уч ўлчамли ҳолда сақланган ушбу мажмуа ёрдамида қадимги бўғимоёқлиларнинг тузилиши ва эволюция босқичларини янада чуқурроқ ўрганиши мумкин бўлади. Айниқса, ўша даврда “қўшимча” оёқлар қандай қилиб мўйлов, қисқич ёки тишсимон жиҳозларга айлангани бўйича муҳим маълумотлар топилган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
