"Манчестер Юнайтед" клуби Бразилия футбол конфедерацияси билан кутилмаган келишувга эришди. Унга кўра, жамоа ҳужумчиси Матеус Куня Англия премьер-лигасининг жорий мавсумдаги қолган ўйинларида майдонга тушмайди. Бу ҳақда Goal.com хабар беради.
Бу қарор жаҳон чемпионати олдидан Бразилия терма жамоаси устози Карло Анчелотти учун катта ёрдам бўлди.
Ушбу қарор "Манчестер Юнайтед"нинг "Ливерпуль" устидан қозонган ғалабасидан сўнг қабул қилинди. Куня мазкур учрашувда муҳим гол киритиб, жамоасининг кейинги мавсум учун Чемпионлар лигасига йўлланмани нақд қилишига ёрдам берган эди.
Клуб ўзининг асосий мақсадига эришгани сабабли, Бразилия терма жамоасига ёрдам беришга қарор қилди. ESPN хабарига кўра, 10-рақам эгаси мавсумнинг сўнгги учта ўйинини ўтказиб юборади ва бор эътиборини жисмоний тикланишга қаратади.
Сўнгги ҳафталарда Куня жароҳат билан боғлиқ муаммолардан азият чекаётган эди. У "Ливерпуль"га қарши ўйинда оғриқ билан ҳаракат қилган бўлса-да, шифокорлар унинг ҳолати ёмонлашишидан хавотирда эди.
Ҳужумчини юқори босимли ўйинлардан озод қилиш орқали, клуб ва конфедерация унинг жаҳон чемпионатига тўлиқ тайёр ҳолатда етиб боришини таъминламоқчи. Турнир бошланишига бир ойдан сал кўпроқ вақт қолди.
Бу хабар Бразилия терма жамоаси бош мураббийи Карло Анчелоттини қувонтириши аниқ. Жамоада шундоқ ҳам жароҳат олганлар сони ортиб бормоқда ва Куня каби асосий ўйинчининг йўқотилиши катта зарба бўлар эди.
Натижада, Куня "Сандерленд", "Ноттингем Форест" ва "Брайтон"га қарши учрашувлар қайдномасига киритилмайди. Унинг ўрнига футболчи якка тартибдаги машғулотлар дастурини бошлайди.
“Zamin”ни Telegram'да ўқинг!
