Байденнинг рейтинги рекорд даражада пасайиб кетди

^{Фото: Reuters}
АҚШ президенти Жо Байденнинг фаолиятини маъқуллаш бўйича рейтинг у президентликка киришганидан буён энг паст даражага тушиб кетди. 6 октябрь куни АҚШнинг Квиннипиак университети томонидан ўтказилган сўровнома натижалари шундан далолат беради.

Сўровномада қатнашган америкаликларнинг 53 фоизи Байденнинг фаолиятини салбий, атиги 38 фоизи эса ижобий баҳолаган. Уч ҳафта олдин худди шу университет ўтказган аввалги сўровномада 42 фоиз аҳоли Байденга ижобий, 50 фоизи эса салбий баҳо берганди. Шундай қилиб, Америка президентининг нуфузида пасайиш тенденцияси кузатилмоқда.

Байденнинг фаолиятини баҳолашда сиёсий қарашлар ўта муҳим роль ўйнайди. Унинг ишига республикачилар орасида респондентларнинг 94 фоизи, демократлар орасида эса атиги 10 фоизи салбий баҳо берган. Бироқ ўзини маълум бир сиёсий куч аъзоси деб ҳисобламайдиганлар орасида президентни қўллаб-қувватлаш рейтинги, ҳатто республикачилардаги ўртача кўрсаткичдан ҳам паст. Бу тоифадаги респондентларнинг 60 фоизи Оқ уй эгасининг саъй-ҳаракатларини салбий, фақат 32 фоизи ижобий баҳолаган.

Америкаликлар, айниқса, президентнинг иммигрантлар сиёсати ва АҚШнинг жанубий чегарасидаги вазиятдан норози. Президентнинг бу борадаги фаолиятига 67 фоиз салбий, 23 фоиз ижобий баҳо берилган.

Сўровнома иштирокчиларнинг атиги 28 фоизи Байденнинг Афғонистон масаласидаги сиёсатини қўллаб-қувватлашини билдирган, 50 фоизи Афғонистонни қўллаб-қувватлаш учун АҚШ у ерда маълум миқдордаги кучларни қолдириши кераклигини, 15 фоизи ҳарбийларни умуман олиб кетмаслик кераклигини айтган. Америкаликларнинг 72 фоизи иқтисодиётнинг аҳволидан маълум даражада норози. Сўровномада бутун мамлакат бўйлаб АҚШнинг 1326 фуқароси иштирок этди. У 1 октябрдан 4 октябргача ўтказилган, статистик хато 2,7 фоизга тенг.

Август ойида «Толибон» Афғонистонни эгаллагандан сўнг Байденнинг рейтинги 46 фоизгача тушиб кетганди. “Замин” янгиликларини “Инстаграм”да кузатиб боринг