Туркияда жиноят оламида «Жаҳаннам Нажоти» (Cəhənnəm Necati) номи билан танилган Жўшқун Арабажи қўлга олинди. Türkiye Today’нинг ёзишича, 53 ёшли жиноятчи 7 октябрь куни Измир аэропортида ушланган. Унинг номи Интерполнинг халқаро қидирув рўйхатида бўлган.
Маълумотларга кўра, Арабажи Германияда «Кёлн отаси» лақаби билан ҳам машҳур бўлиб, унинг номига жиноятлар «тизими» тиркалган: пул ювиш, товламачилик, гиёҳванд моддалар савдоси ва қурол-аслаҳа контрабандаси. Терговга яқин манбалар у бир неча давлатда ташкил этилган жиноий тармоқлар билан боғлиқ бўлганини таъкидламоқда.
Измирдаги махсус амалга оширилган операция давомида Арабажи ҳужжат текшируви чоғида аниқланиб, дарҳол ҳибсга олинди. Маъмурий тартиблар якунлангач, унинг экстрадиция масаласи қонун доирасида кўриб чиқилиши кутилмоқда.
Ҳуқуқни муҳофаза қилиш идоралари маълум қилишича, ушбу қўлга олиш трансмиллий жиноятчиликка қарши олиб борилаётган комплекс чора-тадбирларнинг навбатдаги муҳим босқичи ҳисобланади. Шу орқали яна бир “ўта қидирувдаги” шахснинг изига қопқон қўйилганини кузатиш мумкин.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
