Пластик идишдан овқатланиш юрак касаллигига сабаб бўлади

Пластик идишларда тайёр овқат истеъмол қилиш инсон саломатлиги учун катта хавф туғдириши мумкин — бу борадаги илмий далиллар сони ортиб бормоқда, деб zamin.uz хабар берди. Хитойлик олимларнинг янги, икки босқичли тадқиқотлари натижасига кўра, пластик қутилардан овқат ейиш юрак етишмовчилиги хавфини сезиларли даражада оширади. Ушбу тадқиқот пластикка боғлиқ саломатлик муаммолари ҳақидаги илмий асосланган фактларга муҳим қўшимча бўлади.

Юқори малакали мутахассислар 3 000 дан ортиқ Хитой фуқаролари орасида пластик қутиларда овқат истеъмол қилиш тезлиги ва юрак касаллиги ўртасидаги боғлиқликни ўргандилар. Тадқиқот натижасида пластик идишлардан мунтазам овқатланиш ва юрак фаолиятидаги муаммолар ўртасида аниқ алоқа қайд этилди. Шунингдек, олимлар каламушларга қайноқ сувда пластик қутилардан ажралиб чиққан моддаларнинг экстрактини бир неча ой давомида ичиришди ва уларнинг ичак микробиотаси ҳамда юрак тўқималарида сезиларли ўзгаришлар аниқлади.

Тадқиқот давомида пластик идишларда қайноқ сув ушлаб турилганда, турли кимёвий моддалар юқори миқдорда чиқиши кузатилган. Илгари ўтказилган тадқиқотларда пластик идишлар микротўлқинли печда қиздирилганда ҳар бир см² учун 4,2 миллионгача микропластик зарра ажралиши аниқланган.

Пластик маҳсулотлар таркибида тахминан 20 000 га яқин турли кимёвий модда мавжуд бўлиб, улардан айримлари — масалан, БПА, фталатлар ва ПФАС — инсон саломатлиги учун жиддий хавф туғдириши илмий жиҳатдан исботланган. Ушбу моддалар саратон, гормонал ва репродуктив муаммолар, қон айланиш тизими касалликларига сабаб бўлиши мумкин.

Муҳим жиҳати шундаки, пластик идишда сув бир дақиқа, беш дақиқа ёки ўн беш дақиқа туришидан қатъий назар, каламушларда юзага келган ўзгариш ва зарар ўртасида сезиларли фарқ бўлмаган.

Тадқиқот муаллифлари истеъмолчиларга аниқ тавсиялар бермаган. Аммо соғлиқни сақлаш мутахассислари уйда пластик идишларда иссиқ овқат сақламаслик, микротўлқинли печда пластик идишларни ишлатмаслик ва таомларни шиша, ёғоч ёки зангламас пўлат идишларда сақлашни тавсия қилишмоқда.

Кўчма овқат олишда пластикдан қочиш бироз қийин, бироқ истеъмолчилар ўзлари билан шиша идиш олиб юришлари ёки уйдаги овқатни шиша идишга ўтказишлари мумкин.

Мутахассислар пластик идишлардаги озиқ-овқат инсон ичак муҳитини, яллиғланишни ва умумий соғлиқни жиддий хавф остига қўяётганини таъкидлашмоқда. Бу ҳолат, айниқса, юрак ва қон айланиш тизими касалликлари хавфини оширади. «Замин»ни Telegram’да ўқинг!