Инсон организми учун кўзга илинмас, аммо энг хатарли омиллардан бири — ортиқча шакар истеъмоли. Бу ҳақда кардиолог, тиббиёт фанлари номзоди Олга Стойко ўзининг Telegram орқали тарқатган видеомурожаатида маълум қилди. Унинг сўзларига кўра, кўпчилик инсонлар холестериндан қўрқади, аммо қон томирларини ёпадиган ва “инфаркт йўлини” очадиган асосий омил айнан шакар ва оддий углеводлардир, деб ёзди Topnews.
Шифокорнинг таъкидлашича, айниқса қўшилган шакарлар ва ширин ичимликлар инсон организми учун “оқ заҳар” ҳисобланади. “Оқ нон, печенье, лимонад ва газланган ширин ичимликлар — буларни рациондан бутунлай чиқариш лозим. Улар яллиғланиш жараёнини кучайтиради, қон айланишини издан чиқаради ва томир деворини шикастлайди,” — дейди Стойко.
Мутахассиснинг айтишича, айнан шу жараёнлар натижасида “ёмон” холестерин эндотелий — яъни томирнинг ички қатламига тортилиб, тўсиқлар (плакатлар) ҳосил қилади. Бу ҳолат эса вақт ўтиши билан инфаркт ва инсультга сабаб бўлади. “Ортиқча шакар жигарни ёғ ишлаб чиқаришга мажбур қилади, натижада қон томир деворларига ёпишувчи моддалар кўпаяди,” — деб қўшимча қилди кардиолог.
Олга Стойко яна бир муҳим жузъиятга эътибор қаратди — шакар организмда сувни ушлаб туриб, қон босимининг ортишига сабаб бўлади. “Бир молекула шакар тўрт молекула сувни ушлаб туради. Шу сабабли ортиқча ширинликлар нафақат юракка, балки буйрак ва мия фаолиятига ҳам салбий таъсир кўрсатади,” — деди у.
Шифокор россияликларга ўз рационларини яқин вақт ичида тубдан ўзгартиришни тавсия этди. Унинг сўзларига кўра, “мураккаб углеводлар” — узоқ вақт пишадиган дон маҳсулотлари, сабзавот, мевалар ва оқсил манбалари (масалан, ясмиқ ёки ловия) организм учун анча фойдали ҳисобланади.
Кардиолог кўк чойнинг фойдаси ҳақида ҳам алоҳида тўхталиб ўтди. Унинг таъкидлашича, кўк чой юрак-қон томир тизимини ҳимоя қилувчи “антиоксидант қалқон” яратади. Бироқ унга шакар қўшиш фойдани йўққа чиқаради. “Кўк чойга бир бўлак лимон ёки занжабил қўшиш тавсия этилади. У мунтазам равишда истеъмол қилинса, ‘ёмон’ LDL-холестерин миқдорини пасайтиради,” — дея хулоса қилди у.
Шу тариқа, шифокорнинг фикрича, замонавий инсон учун энг хавфли таом — қандга бой маҳсулотлардир. Уларнинг истеъмолини чеклаш орқали инсон нафақат холестеринни, балки юрак хасталиклари хавфини ҳам сезиларли даражада камайтиради.
“Zamin”ни Telegram'да ўқинг!
