Испания Ла Лигасининг 10-туридан ўрин олган сўнгги йилларнинг энг кутилган учрашуви — “Эль-Класико” Мадридда жуда шиддатли ва эмоцияларга бой тарзда ўтди. “Сантьяго Бернабеу” стадионида бўлиб ўтган беллашувда “Реал Мадрид” ўз мухлислари олдида “Барселона”ни 2:1 ҳисобида мағлуб этди.
Учрашув илк дақиқаларданоқ юқори суръатда бошланди. “Қироллик клуби” 22-дақиқада Килиан Мбаппе томонидан киритилган гол орқали ҳисобни очди. Аммо “Барса” ҳам жавобсиз қолмади — 38-дақиқада Фермин Лопес аниқ зарбаси билан ҳисобни тенглаштирди. Биринчи бўлим жуда кескин ўтди, ҳар икки жамоа ҳимояда ҳам, ҳужумда ҳам фаол ҳаракат қилди.
Иккинчи таймда мадридликлар устунликни қўлга олишди. 43-дақиқада Жуд Беллингемнинг зўр зарбаси “Барса” дарвозасини забт этди ва “Реал” яна олдинга чиқди. Шундан сўнг “Бернабеу”да атмосфера бутунлай ўзгарди — трибуналардаги 80 минг мухлиснинг қувончи стадионни титратди.
Бироқ беллашув нафақат майдонда, балки сўнгги дақиқалардаги тортишувлар билан ҳам ёдда қолди. Учрашув якунлангач, “Реал” ҳимоячиси Дани Карвахаль ва ҳужумчи Винисиус Жуниор “Барселона”нинг ёш юлдузи Ламин Ямал билан тортишиб қолди.
Турнирдан олдин Ямалнинг матбуотда “Реал ҳақидаги” баёноти мадридликларнинг ғашига теккани маълум бўлди. Шунинг учун ўйиндан кейин Винисиус унга шундай мурожаат қилди:
— “Ямал, сен жуда кўп гапирган эдинг, эндичи, нима дейсан?” — деган бразилиялик юлдузнинг сўзлари интернетда тез тарқалди.
Шу билан бирга, “Эль-Класико”нинг охирида икки жамоа ўртасида кичик жанжал ҳам келиб чиқди. Винисиус Жуниорни тинчлантириш учун “Реал” бош мураббийи Хаби Алонсо шахсан аралашди.
Учрашув натижасига кўра, “Реал Мадрид” 27 очко жамғариб, турнир жадвалида пешқадамликни мустаҳкамлади. “Барселона” эса рақибидан беш очко орқада қолди. Бу ғалаба мадридликлар учун нафақат очко жиҳатидан, балки психологик устунлик нуқтаи назаридан ҳам муҳим аҳамият касб этди.
“Zamin”ни Telegram'да ўқинг!
