Самарқандда CITESнинг 20 йиллик Конференцияси юқори даражадаги мулоқот доирасида Самарқанд декларацияси ва 2032 йилгача минтақавий ҳамкорлик режаси имзоланди. Бу ҳақда Экология қўмитаси маълум қилди.
Ҳужжатларни Ўзбекистон, Қозоғистон, Қирғизистон ва Тожикистон имзолади. Traffic International билан ҳамкорликда тайёрланган декларация Марказий Осиё давлатларининг биохилма-хилликка нисбатан тобора кучайиб бораётган таҳдидларга қарши ҳамкорликни кучайтириш ниятини тасдиқлайди.
Бу таҳдидлар яшаш муҳитининг йўқолиши, иқлим ўзгариши ва браконерлик билан боғлиқ. Режага кўра, табиий муҳофаза, божхона, ҳуқуқни муҳофаза қилиш ва суд тизимлари ўртасидаги ҳамкорлик мустаҳкамланади.
Ёввойи табиатга қарши жиноятларга қарши миллий оператив гуруҳлар ташкил этиш, мониторингнинг замонавий технологияларини жорий қилиш ва маълумот алмашувни такомиллаштиришга алоҳида эътибор қаратилади. Минтақавий ҳамкорликни ривожлантириш доимий оператив маълумот алмашинуви, қўшма назорат механизмлари ва чегарадош ҳудудлардаги мувофиқлаштирилган ҳаракатлар орқали амалга оширилади.
Давлатлар ёввойи ҳайвонот ва ўсимлик дунёсининг ноқонуний савдосини тўхтатиш, экотизимларни тиклаш ва нодир турларни ҳимоя қилиш чораларини ўз ичига олган умумий стратегияни ишлаб чиқишга келишиб олди.
Меҳмон гуруҳидаги фойдаланувчилар ушбу мақолага изоҳ қолдира олмайди.
