Ўзбекистонда ўтган 10 ойда оилавий зўравонлик сабаб маъмурий жавобгарликка тортилганлар сони эълон қилинди. Олий суд матбуот котиби Азиз Обидовнинг маълумотига кўра, Маъмурий жавобгарлик тўғрисидаги кодекснинг 59-2-моддаси асосида 10 003 нафар шахс жавобгарликка тартилган. Мазкур модда таълим, соғлиқ ва меҳнат ҳуқуқларига тўсқинлик қилиш, шаънни таҳқирлаш, мол-мулкка зарар етказиш, қўрқитиш, калтаклаш ёки енгил тан жароҳати етказиш каби хатти-ҳаракатлар учун жарима ёки маъмурий қамоқни назарда тутади.
Шу билан бирга, зўравонликка учраган аёллар ўртасида ўтказилган сўров ҳам жиддий ҳолатни кўрсатди: ҳар бешинчи аёл ўз жонига қасд қилиш ҳақида ўйлаб кўрган. Андижонда бу кўрсаткич 33,3 фоиз бўлган бўлса, Навоийда 6 фоизгача тушади — бу ҳудудлар бўйича руҳий босим даражасидаги катта тафовутни англатади.
Аёллар стрессни асосан жисмоний фаоллик ва уй ишлари билан енгишга ҳаракат қилади (29,2%), баъзилари ёлғиз қолишни афзал кўради (23,9%), 22,5 фоизи ҳиссий портлашлар орқали реакция қилади. Фақат 11,1 фоиз аёл яқинлари билан гаплашиб енгиллик олади. 6,7 фоиз эса стрессдан чиқишда қийналганини айтган — бу мақсадли психологик ва ижтимоий ёрдамга эҳтиёж катта эканини кўрсатади.
Жамиятдаги оилавий зўравонлик ҳолатлари камайиши учун фақат жазо чоралари эмас, балки тизимли профилактика, руҳий қўллаб-қувватлаш ва ахборот ишлари ҳам муҳим аҳамиятга эга.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
